Den israeelesche Sender “Channel 12” huet erkläert, dass en eng angeeblech Ëmfro iwwer d’Behandlung vu Gefaangenen duerch d’israeelesch Arméi wärend dem Gaza-Krich net diffuséiert huet.
Dës angeeblech Ëmfro war am August 2024 a Sozialen Netzwierker ëmhiergaangen. D’AFP huet erausfonnt, dass d’Bild aus enger Ëmfro aus dem Joer 2022 gefälscht gouf, déi méi wéi ee Joer virum Krich gemaach gi war. Déi falsch Bäiträg waren opgedaucht, nodeem den Noriichtesender Opnamen diffuséiert hat, déi ze weise schéngen, wéi israeelesch Zaldote palästinensesch Gefaangener op engem Militärlager sexuell mësshandelt hunn.
“Den israeelesche Sender ‘Channel 12’ huet an enger ëffentlecher Meenungsëmfro an Israel d’Fro gestallt: Stëmmt Dir der Behaaptung zou, dass en Zaldot e Gefaangene mat gefesselten Hänn vergewaltegen dierf? 47 % Jo, 43 % Nee”, steet am Text zu engem manipuléierte Bild, dat den 11. August 2024 op Facebook verëffentlecht gi war.
D’Bild weist en Noriichtespriecher vum israeelesche Sender “Channel 12”, deen nieft der Grafik vun der Ëmfro steet. Dobäi steet op hebräesch eng Fro, déi follgendermoossen iwwersat ka ginn: “Stëmmt Dir zou, dass en Zaldot en ‘Terrorist’ vergewaltegen dierf?”
© AFP
D’Bäiträg waren am Internet opgedaucht, nodeem d’Vereenegt Staaten Israel opgefuerdert haten, no der Verbreedung vun engem Video, deen Zaldote bei sexuellem Mëssbrauch vun engem palästinensesche Gefaangenen de 7. August ze weise schéngt, ze ermëttelen a Rechenschaft ofzeleeën (archivéierte Link).
Den duerchgesickerte Video, deen op “Channel 12” diffuséiert gouf, huet israeelesch Zaldote gewisen, déi sech hanner Schëlder verstoppen an, wéi Online-Kommentatore suggeréieren, sexuell Handlungen un engem Gefaangenen an der Militärbasis Sde Teiman virhuelen.
Den israeelesche Militär huet matgedeelt, en hätt eng Untersuchung wéinst “presuméierter Mësshandlung” vun engem Häftling an der Ariichtung an d’Weeër geleet, wou bekanntermoosse Palästinenser festgehale ginn, déi wärend dem Krich a Gaza verhaft goufen (archivéierte Link).
“Channel 12” huet de 7. August eng kontrovers Debatt diffuséiert, an där iwwer d’Legaliséierung vu Vergewaltegungen a Mësshandlunge vu palästinensesche Gefaangene rieds goung (archivéierte Link).
De Krich gouf duerch d’Attack vun der Hamas, déi hires Gläiche sicht, op Israel de 7. Oktober 2023 ausgeléist, bei där engem AFP-Rapport no, dee sech op offiziell israeelesch Zuele stäipt, 1.205 Mënschen ëmbruecht goufen, déi meescht dovun Zivilisten (archivéierte Link).
D’militäresch Revanchemoossname vun Israel, fir d’Hamas ze vernichten, hunn no den Donnéeë vum Gesondheetsministère am vun der Hamas kontrolléierte Gebitt 40.819 Mënschen ëmbruecht.
Dat gefälscht Bild gouf op Facebook vun Notzer aus Malaysia a Singapur gedeelt.
Änlech falsch Bäiträg goufen och am Sozialen Netzwierk X a Pakistan an am Vereente Kinnekräich gedeelt.
Geännerte Screenshot
Eng ëmgekéiert Billersich op Google huet d’Originalmaterial vum Norichtebäitrag fonnt, dat de 27. Mee 2022 op der Internetsäit vun “Channel 12” verëffentlecht gi war (archivéierte Link).
De Video vun 2 Minutten a 6 Sekonne weist e Moderator, deen d’Norichten zesumme mat Ëmfroresultater presentéiert, déi op Hebräesch heeschen: “Stëmmt Dir der Behaaptung zou, dass d’Regierung op Ënnerstëtzer vum Terrorismus ugewisen ass?”
Den hebräeschsproochegen Deel vum Video heescht op Lëtzebuergesch: “Ee Joer nei Regierung: eng Ëmfro iwwer d’Mandater”.
Den Zäitstempel fir de Screenshot vum Clip, deen am ierféierende Bäitrag benotzt gouf, ass bei 1 Minutt a 46 Sekonnen ze gesinn.
Op dësem manipuléierte Bild bedeckt eng blo Këscht de Bildschierm a verdeckt déi ursprénglech Fro, déi zesumme mat de Resultater um Bildschierm hanner dem Norichtespriecher ugewise gouf.
Wéi d’israeelesch Zeitung “Haaretz” gemellt huet, hat sech “Channel 12” uschléissend fir d’Ëmfro entschëllegt (archivéierte Link).
Ënnen ass e Screenshot-Verglach vum manipuléierte Bild (lénks) a vum Originalvideo vun “Channel 12” (riets) ze gesinn:
© AFP
Den Alon Shani, e Spriecher vun “Channel 12”, sot der AFP den 21. August: “Mir sinn eis deem bewosst an hunn e Fake-Alarm verëffentlecht, kuerz nodeem et online verbreet gouf.”
De Sender huet déi falsch Meldungen den 9. August op eege Fauscht op Hebräesch opgedeckt.
© AFP
D’AFP huet nach eng Rëtsch aner Feelinformatiounen iwwer de Krich tëscht Israel an der Hamas iwwerpréift.
Dësen AFP-Artikel gouf vun RTL op Lëtzebuergesch iwwersat.
