D’russesch Arméi hat Ufank Abrëll 2025 matgedeelt, d’russesch Regioun Kursk bal vollstänneg vun der Ukrain zeréckeruewert ze hunn. Kuerz drop war eng Grafik iwwer Mercenairë vu verschiddenen Nationalitéiten, déi d’russesch Arméi do angeeblech dout opfonnt hätt, am Ëmlaf.
Op der Grafik ass de Logo vum Statistik-Portal Statista ze gesinn. Se ass awer gefälscht, wéi eng Rei Ongereimtheeten an der Grafik weisen.
“Dës Zuele komme vu Statista. Hei gesi mir, wien a Kursk alles agesat gouf”, housch et an engem Telegram-Bäitrag vum 16. Abrëll 2025. “Dorënner waren 197 däitsch Söldner!” D’Zuel staamt vun enger Grafik, déi mam Bäitrag gedeelt gouf. Se schéngt d’Nationalitéiten an d’Unzuel vun den angeeblech Söldner, déi ëm d’Liewe koumen, an de russescher Regioun Kursk opzeschlësselen. Am Eck vun der Grafik ass de Logo vum däitsche Statistik-Portal “Statista” ze gesinn. Dat mécht den Uschäin, dass et sech ëm seriö Donnéeën handelt.
Ënnert der englescher Iwwerschrëft “D’Nationalitéite vun de Söldner, deenen hir Läichen an der Regioun Kursk, Russland, fonnt goufen”, déi der Legend no fir d’ukrainesch Arméi gekämpft hätten, lëscht déi vermeintlech Statista-Grafik angeeblech dout opfonnt Mercenairen aus néng Staaten op. Déi meescht wären aus Polen (1963) a Georgien (1230) gewiescht, duerno kéime Kolumbien (917), Frankräich (208) an Däitschland (197). Weider Mercenairen hätten angeeblech aus Groussbritannien, den USA, Australien a Japan gestaamt.
D’Grafik gouf och op Facebook an a villen anere Sprooche wéi Englesch, Franséisch a Spuenesch gedeelt.
© AFP
D’Grafik ass awer gefälscht. Dat léisst sech u verschiddenen Ongereimtheeten an der Duerstellung erkennen.
Fir d’éischt stécht awer besonnesch den Datum, deen an der Grafik uginn ass, an d’A. Well zwee Deeg virum Stand vun den angeeblechen Doudeszuele vun der Statistik, also dem 8. Abrëll 2025, hat de russesche Militär gemellt, dass en eent vun de leschten nach vun der Ukrain besaten Dierfer an der russescher Grenzregioun Kursk zeréckeruewert hätt, déi ënner ukrainescher Kontroll stoung.
Den ukrainesche President Wolodymyr Selenskyj hat de selwechten Dag erkläert, d’ukrainesch Arméi wär an d’russesch Grenzregioun Belgorod virgedrongen. Gläichzäiteg widdersprécht d’Ukrain zënterhier der russescher Duerstellung, russesch Truppen hätte si aus Kursk zeréckgedrängt.
Tatsächlech kämpfen am russesche Krich géint d’Ukrain op béide Säite Mënsche mat aneren Nationalitéiten. Geséchert an onofhängeg Informatiounen doriwwer ze kréien, ass awer schwiereg. Engem AFP-Bericht no sinn op russescher Säit nordkoreanesch Zaldoten am Asaz. Och a Staate wéi Nepal, Sierra Leone oder Somalia huet Russland deemno Zaldote rekrutéiert. Och Chineese solle sech Russland ugeschloss hunn.
Op ukrainescher Säit hätte sech ukraineschen Angaben no schonn am Ufank vum Krich 20.000 international Fräiwëlleger gemellt. AFP-Journalistinnen a -Journalisten hu wärend dem Krich an der Ostukrain mat Zaldoten aus de Vereenegte Staaten, Groussbritannien, Frankräich, Japan, Irland a Kolumbien geschwat, déi op der Säit vun der Ukrain kämpfen.
Gefälscht Grafik huet keng Quell a falsch Fändelen
Eng Rei Detailer vun der Grafik weisen awer, dass se net vu Statista kënnt. Statista ass eng an Däitschland gegrënnt Statistik-Entreprise, déi hirer Internetsäit no “Statistiken, Rapporten a Fakten iwwer 80.000 Sujeten aus 22.500 Quellen an 170 Branchen” weist.
Op den éischte Bléck fält op, dass d’gefälscht Grafik keng Quellenangab huet. A Grafike vu Statista, déi zum Beispill op dem Instagram-Account vum Portal gepost goufen, ass d’Quell ëmmer ënnert den Diagrammen uginn. D’gefälscht Grafik gräift zwar den Design vun de Social-Media-Posts vu Statista op, weist awer keng Quellen.
© AFP
E weideren Indice op eng Fälschung sinn zwee vun den dräi presentéierte Fändelen: Fir Däitschland gëtt e Fändel benotzt, dee wéi d’Bundesdienstflagge mat dem Bundesschild an Adler drop ausgesäit. Se däerf just vu federalen Administratioune benotzt ginn, wouzou Statista net zielt. D’Portal notzt a senge Bäiträg en Däitschlandfändel ouni Adler. Ausserdeem gouf beispillsweis fir d’USA fälschlecherweis de Fändel vu Liberia benotzt. Op dem amerikanesche Fändel si méi Stären a Sträifen ze gesi wéi dat um Fändel vum westafrikanesche Land de Fall ass.
© AFP
Och d’Iwwerschrëft ass anescht gestalt wéi an echte Grafike vu Statista. An der Fälschung si just de Sazufank an den éischte Buschtaf vun de Substantiver grouss geschriwwen. An authentesche Grafike vum Statistik-Portal fänken awer all d’Wierder am Titel mat grousse Buschtawen un, ausser beispillsweis Konjunktiounen. Ausserdeem huet d’AFP op dem Instagram-Account just Grafike mat Iwwerschrëfte fonnt, déi iwwer eng oder zwou Zeile ginn. D’Iwwerschrëft vun der gefälschter Grafik geet iwwer dräi Zeilen.
© AFP
Eng ëmgekéiert Billersich huet ausserdeem zu engem Linkedin-Bäitrag vum Statista-Mataarbechter Marc Luettgemann vu Mëtt Abrëll 2025 geféiert. Doran huet hien erkläert, dass d’Grafik gefälscht wär an zielt déi selwecht Ofwäichunge vun den echte Statista-Grafiken op, déi uewen opgeféiert sinn. Dass eng Fälschung am Internet ënnerwee ass, wär ausserdeem net déi éischt Kéier geschitt: “Virun e puer Méint hu mir déi éischt fonnt, elo déi zweet: Eis Infografike ginn anscheinend fir prorussesch Propagandazwecker gefälscht”, huet de Luettgemann geschriwwen.
Dat huet Statista op AFP-Ufro confirméiert. “Dës Infografik gouf net vu Statista erstallt a mir stinn a kenger Manéier a Verbindung mat den doran duergestallten Donnéeën”, huet eng Spriecherin de 25. Abrëll 2025 matgedeelt. Och si huet op déi ernimmt Onstëmmegkeeten an der Konzeptioun verwisen. Ausserdeem géif Statista keng Donnéeën iwwer Mercenairë mat verschiddenen Nationalitéiten am Ukrain-Krich erhiewen. Esou Donnéeë géifen dem Portal och net aus anere Quellen zur Verfügung stoen, huet d’Spriecherin erkläert.
Op der Internetsäit vu Statista gëtt et och keng Resultater mat dësen Donnéeën, wéi eng Stéchwierdersich op Englesch gewisen huet.
An engem Telegram-Bäitrag ass op der Grafik ënne riets zousätzlech d’Domaine fishki.net ze erkennen. Dobäi handelt et sech ëm eng Internetsäit, där hir IP-Adress a Russland ze fannen ass. Dat kéint och dorop hindeiten, dass d’Grafik net vu Statista kënnt.
De Contenu vun der gefälschter Grafik léisst sech net final an onofhängeg iwwerpréiwen. Sou gëtt et och just Schätzungen iwwer d’Unzuel vun allen Doudesaffer am Ukrain-Krich, déi bis elo gezielt goufen. Enn Abrëll 2025 hätte sech dës engem NATO-Beamten no op ronn 250.000 ëmbruecht russesch an 1.500 doutgemaach nordkoreanesch Zaldote belaf. Op ukrainescher Säit variéieren offiziell Zuelen tëscht 45.000 an 100.000 ermuert ukrainesch Zaldoten.
Weider Faktenchecken iwwer den Ukrain-Krich gëtt et op der Internetsäit vun der AFP.
Fazit: Eng Grafik, déi online gedeelt gouf, iwwer ermuert Zaldoten an der Regioun Kursk staamt net vum däitsche Statistik-Portal Statista, mee gouf gefälscht. Eng Rei Ongereimtheete wéi falsch Fändelen oder déi feelen Quellenangab deiten dorop hin. Statista huet ausserdeem géintiwwer der AFP erkläert, dass d’Grafik gefälscht an net vum Portal selwer verëffentlecht gi wär.
Dëse Faktencheck gouf vun RTL op Lëtzebuergesch iwwersat.
