{"id":32947,"date":"2022-04-28T10:30:32","date_gmt":"2022-04-28T10:30:32","guid":{"rendered":"https:\/\/belux.wpengine.com\/?p=32947"},"modified":"2022-06-28T14:44:28","modified_gmt":"2022-06-28T14:44:28","slug":"rtl-faktencheck-gtt-et-och-en-negativen-index-mat-deem-dgehlter-gekierzt-kinte-ginn","status":"publish","type":"post","link":"https:\/\/belux.edmo.eu\/lb\/rtl-faktencheck-gtt-et-och-en-negativen-index-mat-deem-dgehlter-gekierzt-kinte-ginn\/","title":{"rendered":"RTL-Faktencheck: G\u00ebtt et och en negativen Index, mat deem d’Geh\u00e4lter gekierzt k\u00e9inte ginn?"},"content":{"rendered":"
\n
\n
\n

\u00a9 RTL-Grafik<\/b><\/p>\n<\/div>\n

\n

F\u00e4lt eng Indextranche un, free\u00eb sech d’Salari\u00e9en – hir Geh\u00e4lter ginn \u00ebm 2,5% erop. M\u00e4 k\u00e9inten d’Salair\u00eb bei enger Deflatioun och duerch een “negativen Index” gekierzt ginn?<\/p>\n

An Z\u00e4ite vu wirtschaftlecher Ons\u00e9cherheet a klammende Pr\u00e4isser flamen Diskussiounen \u00ebm den Index \u00ebmmer nees op. Esou och 1982, wou et no Joren vun der Inflatioun – ausgel\u00e9ist duerch zwou P\u00ebtrolskrisen – quasi zu engem Generalstreik koum,<\/a> nodeems d\u00e9i deemoleg Regierung d’Index\u00e9ierung vun de Geh\u00e4lter ausser Kraaft setze wollt.<\/p>\n

De Mechanismus, mat deem dem W\u00e4ertverloscht vun de Geh\u00e4lter entg\u00e9intgewierkt an d’Pr\u00e4isdeierecht ausgeglach gi soll, g\u00ebtt et zu L\u00ebtzebuerg schonn zanter 1921 a senger rudiment\u00e4rster Form. Ufanks just fir Fonctionnairen an Eisebunner ass den Index zanterhier an enger Rei Etappen \u00ebmmer nees ugepasst an op d’Allgemengheet ausgeweit ginn.<\/p>\n

Och haut ass d’Thema Index no zwee Joer Pandemie a klammenden Energiepr\u00e4isser am Kader vum Krich an der Ukrain nees un der Dagesuerdnung. Am Oktober 2021 an am Abr\u00ebll 2022 goufen d’Geh\u00e4lter schonn \u00ebm jeeweils 2,5 Prozent no uewen ugepasst. D\u00e9i dr\u00ebtt Indextranche, d\u00e9i warscheinlech am August ufale g\u00e9ing, g\u00ebtt op de Fr\u00e9ijoer 2023 verluecht.<\/p>\n

Wat ass den Index a w\u00e9i s\u00ebtzt e sech zesummen?<\/p>\n

De Prinzip ass einfach: Kl\u00ebmmt d\u00e9i kumul\u00e9iert Inflatioun zanter der leschter Indextranche iwwer de W\u00e4ert vun 2,5 Prozent, da g\u00ebtt eng nei Indextranche declench\u00e9iert. Doropshi ginn dann och d’Geh\u00e4lter \u00ebm 2,5 Prozent an d’Luucht. De Salaire g\u00ebtt esou proportionell un d’Pr\u00e4isdeierecht ugepasst, fir engem Verloscht vun der Kafkraaft entg\u00e9int ze wierken. Zanter 1985 goufen et 32 Indextranchen, mat e puer m\u00e9i rouege Joren t\u00ebscht 1995 an 2000 an t\u00ebscht 2013 an 2018.<\/p>\n

\"RTL\"<\/p>\n

Ob a w\u00e9i vill d’Pr\u00e4isser klammen, iwwerwaacht de STATEC, deen d’Evolutioun vun de Consommatiounspr\u00e4isser all Mount an engem Rapport publiz\u00e9iert. Mat H\u00ebllef vun engem duerchschn\u00ebttleche “Wuerekuerf”<\/a> u Produkter a Servicer, dee sech aus iwwer 66.000 verschiddene Pr\u00e4isser zesummesetzt, k\u00ebnnen d’Mataarbechter vun der nationaler Statisticagence d’Pr\u00e4isser Mount fir Mount matenee vergl\u00e4ichen. De STATEC ass et dann och, deen d’F\u00e4llegkeet vun enger neier Indextranche signalis\u00e9iert.<\/p>\n

De sougenannten “Wuerekuerf” setzt sech aus 12 Haaptkategorien zesummen an \u00ebmfaasst nieft Liewensm\u00ebttel zum Beispill och Loyeren, Energiepr\u00e4isser, Transportk\u00e4schten, handwierklech D\u00e9ngschter a Fr\u00e4iz\u00e4itaktivit\u00e9iten. Net mat dra fl\u00e9issen d’Kafpr\u00e4isser vun Immobilien.<\/p>\n

De Wuerekuerf g\u00ebtt reegelm\u00e9isseg ugepasst an \u00ebnner Ber\u00e9cksiichtegung vum reale Consommatiounsverhale vun den Awunner nei gewiicht. Esou hunn d’Leit zu L\u00ebtzebuerg bannent de leschten zwee Joer w\u00e9inst der Pandemie zum Beispill manner Sue fir Reesen ausginn. Gewiichtung vun d\u00ebse Positiounen ass am Pr\u00e4isindex deementspriechend fir d\u00ebs Period och no \u00ebnnen ugepasst ginn, w\u00e9i de Marc Ferring vum STATEC an der RTL-Emissioun “Invit\u00e9 vun der Redaktioun” erkl\u00e4ert huet.<\/a><\/p>\n

Ass en negativen Index m\u00e9iglech?<\/p>\n

Mee wat g\u00e9ing gesch\u00e9ien, wann d’Pr\u00e4isser am “Wuerekuerf” vum STATEC g\u00e9inge falen amplaz vu klammen? K\u00e9int et am Fall vun enger Deflatioun och een “negativen” Index ginn, bei deem d’Geh\u00e4lter \u00ebm -2,5 Prozent k\u00e9inte gekierzt ginn?<\/p>\n

D\u00e9i kuerz \u00c4ntwert ass: Jo. Den Index ass am Artikel L. 223-1 vum Code du Travail <\/a>festgehalen a bas\u00e9iert sech op dem Artikel 11 vun engem Gesetz aus dem Joer 1963,<\/a> dat d’Paien vu Fonctionnairen reegelt. An d\u00ebsem steet geschriwwen: “L\u2019augmentation ou la diminution de l\u2019indice du co\u00fbt de la vie<\/strong> par deux points et demi pour la p\u00e9riode semestrielle \u00e9coul\u00e9e se traduit par une hausse ou une baisse correspondante<\/strong> des traitements qui sont \u00e9tablis sur la base de l\u2019indice pond\u00e9r\u00e9 du co\u00fbt de la vie au premier janvier 1948.”<\/p>\n

Also: Genausou w\u00e9i eng Indextranche bei enger Hausse vun de Consommatiounspr\u00e4isser \u00ebm +2,5 Prozent virgesinn ass, esou k\u00e9int et theoretesch och eng Baisse vun de Geh\u00e4lter \u00ebm 2,5 Prozent ginn, wann d’Pr\u00e4isser \u00ebm deen n\u00e4mmlechten Taux g\u00e9ife falen.<\/p>\n

W\u00e9i warscheinlech ass eng negativ Indextranche?<\/p>\n

Zu L\u00ebtzebuerg gouf et bis elo nach ni eng negativ Indextranche. W\u00e4rend eng liicht Inflatioun \u00fcblech, a mam Zil vun 2 Prozent vun der europ\u00e4escher Zentralbank souguer och erw\u00ebnscht ass, ass eng laang unhalend Deflatioun n\u00e4mlech ee wesentlech m\u00e9i seelent Phenomen. Zu L\u00ebtzebuerg louch den annuellen Inflatiounstaux zanter 1949 er\u00e9ischt dr\u00e4imol am negative Ber\u00e4ich: 1953 (-0,2%), 1955 (-0,1%) an 1987 (-0,1%).<\/p>\n

<\/div>\n