{"id":515362,"date":"2026-06-01T10:07:11","date_gmt":"2026-06-01T10:07:11","guid":{"rendered":"https:\/\/belux.edmo.eu\/?p=515362"},"modified":"2026-06-02T09:18:15","modified_gmt":"2026-06-02T09:18:15","slug":"faktencheck-the-family-of-man-ausstellung-anescht-wi-kulturminister-sot-ware-fotoen-ditlech-mi-laang-ze-hijer-fiichtegke","status":"publish","type":"post","link":"https:\/\/belux.edmo.eu\/lb\/faktencheck-the-family-of-man-ausstellung-anescht-wi-kulturminister-sot-ware-fotoen-ditlech-mi-laang-ze-hijer-fiichtegke\/","title":{"rendered":"Faktencheck: “The Family of Man”-Ausstellung: Anescht w\u00e9i Kulturminister sot, ware Fotoen d\u00e4itlech m\u00e9i laang ze h\u00e9ijer Fiichtegkeet ausgesat"},"content":{"rendered":"

[vc_row][vc_column][vc_column_text css=””]<\/p>\n

\n
\n
\n

D\u2019Fotoen an der Ausstellung The Family of Man, d\u00e9i zu Clierf ausgestallt an de Siegel vum Unesco Weltkulturierwen hunn, waren d\u00e4itlech m\u00e9i laang ze h\u00e9ijer Fiichtegkeet ausgesat, w\u00e9i de Kulturminister Eric Thill (DP) gesot huet.<\/b><\/p>\n

Den Eric Thill war den 11. Abr\u00ebll Invit\u00e9 an der RTL-Sendung Background<\/a>. Do goung et \u00ebnnert anerem och \u00ebm d’Probleemer mat der Klimaanlag an der Ausstellung. Den Eric Thill sot am Gespr\u00e9ich, “datt do verschidde kritesch W\u00e4erter zu minimalen Z\u00e4itpunkten iwwerschratt goufen. Sou. Dat ass an deem S\u00ebnn awer net weider schl\u00ebmm, wann d\u00e9i kritesch W\u00e4erter net iwwert e l\u00e4ngeren Z\u00e4itraum iwwerschratt ginn. Dat war hei de Fakt. Dat ass geschitt. Do ware Minutten, wou dee W\u00e4ert iwwerschratt ginn ass. Dee kritesche W\u00e4ert. A wou mer elo natierlech eis Gedanke maachen, datt dat doten net m\u00e9i ka gesch\u00e9ien.\u201d<\/i><\/p>\n

De Kulturminister hat weider erkl\u00e4ert: \u201cEch ginn d\u00e9i Informatioune weider, d\u00e9i ech vu mengen Experten aus dem CNA kritt hunn. Ech selwer sinn als Kulturminister net Heizungstechniker oder och Spezialist, wat d’Klimaanlagen ugeet. Voil\u00e0, dat ass dat wat ech Iech haut hei ka soen.\u201d<\/i><\/p>\n

A senger \u00c4ntwert op eng parlamentaresch Fro<\/a> vun den CSV-Deput\u00e9ierte St\u00e9phanie Weydert a Jean-Paul Schaaf hat de Minister Uganks M\u00e4erz erkl\u00e4ert, \u201cbei der Maintenance vun der Klimatisatioun am Juli 2025 gouf best\u00e4tegt, datt ee vun den zwee Kompressere vun der HVAC-Anlag defekt an net reparabel war. De 25. Juli 2025 goufen zous\u00e4tzlech v\u00e9ier Entfiichter install\u00e9iert, fir d\u2019Hygrometrie weider ze stabilis\u00e9ieren, an et gouf e verst\u00e4erkte Monitoring agefouert, fir all Schwankung direkt k\u00ebnnen ze dokument\u00e9ieren an ze analys\u00e9ieren.\u201d<\/i><\/p>\n

Den 11. M\u00e4erz war de Minister zesumme mam CNA-Direkter Gilles Zeimet an der Kulturkommissioun vun der Chamber<\/a>. D\u00e9i Sitzung gouf w\u00e9inst engem technesche Probleem net live iwwerdroen. Ma do hat den CNA-Direkter erkl\u00e4ert, datt d\u00e9i kritesch W\u00e4erter just w\u00e4rend e puer Deeg iwwerschratt goufen, w\u00e9i de Marc Baum<\/a>, Deput\u00e9ierte vun d\u00e9i L\u00e9nk seet:
\n“Hien huet an d\u00e4r Kommissiounss\u00ebtzung behaapt, datt et just ee liichten Depassement vun de W\u00e4erter w\u00e4rend aacht Deeg ginn ass.\u201d<\/i> Dob\u00e4i hat sech de Gilles Zeimet op eng Moyenne vun allen Ausstellungsraim zesummegerechent bezunn.<\/p>\n

<\/p>\n

Romain Girtgen\u00a9<\/em><\/p>\n

Ma wat sinn iwwerhaapt d’Richtlinne fir d’Conservatioun vun de Fotoen? Am Summer soll d’Temperatur an de Raim vun der Expo 20 Grad an d’Loftfiichtegkeet 50 Prozent sinn. Am Wanter sollen et 18 Grad sinn. Dob\u00e4i si Schwankungen an der Temperatur vun iwwert en Dag gekuckt engem Grad no uewe respektiv no \u00ebnnen erlaabt. D’Loftfiichtegkeet kann iwwer 24 Stonnen \u00ebm f\u00ebnnef Prozentpunkten no uewen oder \u00ebnne vari\u00e9ieren. Esou wuel d’Loftfiichtegkeet an d’Temperatur an den Ausstellungsraim ginn Dag a Nuecht permanent gemooss an all hallef Stonn festgehalen. A verschiddene Raim ginn et esouguer multipel Miesspunkten.<\/p>\n

RTL huet ant\u00ebscht d’Miessungen aus der Ausstellung vu Juni 2025 bis M\u00e4erz 2026 inclus \u2013 Honnertdausende\u00a0Miessw\u00e4erter\u00a0– selwer konnte kontroll\u00e9ieren*. Aus der Ausw\u00e4ertung erg\u00ebtt sech en anert Bild, w\u00e9i dat, wat den CNA-Direkter Gilles Zeimet an der Chamber ginn hat. Zwar goufen, wann een d’Moyenn\u00eb vun alle S\u00e4ll kuckt, d’Limitten effektiv just w\u00e4rend e puer Deeg iwwerschratt. Ma d\u00e9i Moyenne seet n\u00e4ischt aus, oder schl\u00ebmmer, si verstoppt d\u00e9i reell Situatioun an deenen eenzele Raim, an domat d’Conditiounen, deenen d’Fotoen do tats\u00e4chlech ausgesat sinn. An deenen eenzele S\u00e4ll gouf et n\u00e4mlech deels grouss Iwwerschreidunge vun de Limitten an dat och iwwert l\u00e4nger Z\u00e4itraim. Eise Berechnungen no g\u00ebtt et bal kee Raum an der Expo, an deem d’Limitten net iwwerschratt goufen \u2013 souguer wa mir d’Moyenn\u00eb vun de Capteuren aus engem Sall huelen, w\u00e9i d’Grafik 1 weist.<\/p>\n

Am Sall 0607 loung d’Loftfiichtegkeet zum Beispill op 95 Deeg iwwert den ieweschte Limitten (Grafik 3). An d\u00ebsem Raum koum et reegelm\u00e9isseg zu Sp\u00ebtzen iwwer 70 Prozent Loftfiichtegkeet. De 25. Juli, deen Dag, wou dem Minister no d’Entfiichter an d’Expo bruecht goufen, ass se viru M\u00ebtteg op bal 80 Prozent geklommen (Grafik 2). Quasi tropesch Zoust\u00e4nn – an dat ass de Probleem: Bei esou h\u00e9ijer Loftfiichtegkeet qu\u00ebllt d’Gelatine op de Fotoen, respektiv et ka sech Schimmel bilden.<\/p>\n