{"id":79517,"date":"2022-07-25T09:30:04","date_gmt":"2022-07-25T09:30:04","guid":{"rendered":"https:\/\/belux.edmo.eu\/?p=79517"},"modified":"2022-07-25T14:03:02","modified_gmt":"2022-07-25T14:03:02","slug":"rtl-faktencheck-wi-zouverlsseg-si-wiederprevisioune-wierklech","status":"publish","type":"post","link":"https:\/\/belux.edmo.eu\/lb\/rtl-faktencheck-wi-zouverlsseg-si-wiederprevisioune-wierklech\/","title":{"rendered":"RTL-Faktencheck: W\u00e9i zouverl\u00e4sseg si Wiederprevisioune wierklech?"},"content":{"rendered":"
\n
\n
\n

\u00a9 RTL-Grafik<\/b><\/p>\n<\/div>\n

\n

Et kennt een et: Verl\u00e9isst ee sech op d’Wiederprevisioune k\u00ebnnt et anescht, a gleeft een hinnen net, steet een awer nawell dacks am Reen. Mee w\u00e9i zouverl\u00e4sseg si Wiederprevisiounen hautdesdaags wierklech, a w\u00e9i eng Faktore spillen eng Roll?<\/p>\n

Schonn eng Woch virdru gouf Alarm geschloen: en D\u00ebnschdeg d’lescht Woch sinn zu L\u00ebtzebuerg Temperaturen \u00ebm d\u00e9i 39 Grad erreecht ginn. Sechs Deeg virdrun den 13. Juli hat den \u00cbmweltminist\u00e8re iwwerdeems zesumme mam Waasserwirtschaftsamt eng Phase de Vigilence fir Dr\u00e9chent ausgeruff. Doranner war \u00ebnner anerem ze liesen, datt iwwert d\u00e9i kommend zwou Wochen Temperature vun iwwer 30 Grad an eng Absence vu Reen ze erwaarde wieren.<\/p>\n

M\u00e4 w\u00e9i laang am viraus kann een eigentlech zouverl\u00e4sseg Wiederprevisioune maachen? Kann ee pauschal soen, datt et ee waarme Summer, bez\u00e9iungsweis een naasse Wanter w\u00e4ert ginn? An ass et zum Beispill m\u00e9i einfach, eng H\u00ebtztwell virauszesoen, w\u00e9i Donnerwiederen an Iwwerschwemmungen?<\/p>\n

D\u00ebs an aner Froen hu mir dem MeteoLux-Meteorolog Luca Mathias gestallt. Virop gesot: Konkret\u00a0\u00c4ntwerte ginn et net op all Froen.<\/p>\n

W\u00e9i vill Deeg am viraus sinn zouverl\u00e4sseg Wiederprevisioune m\u00e9iglech?<\/p>\n

Datt eng Wiederprognos fir den n\u00e4chsten Dag eng Trefferquot vun zum Beispill 90 Prozent, an d\u00e9i fir den iwwern\u00e4chsten Dag eng vu beispillsweis 75 Prozent h\u00e4tt, kann een net esou global soen. D’Treffs\u00e9cherheet ka souwuel vun de Wiederparameter – zum Beispill Temperatur, Nidderschlag oder Wand – w\u00e9i och vun der Wiederlag ofh\u00e4nken, erkl\u00e4ert de Meteorolog Luca Mathias.<\/p>\n

“Heiansdo huet ee stabil Grousswiederlage mat H\u00e9ichdrockgebitter, d\u00e9i engem eng immens fiabel Previsioun bis zum 5. oder esouguer 7. Dag erlabe k\u00ebnnen. Am Kontrast dozou huet een awer och emol mat Wiederlagen ze k\u00e4mpfen, d\u00e9i engem et scho schw\u00e9ier maachen, fir d\u00e9i n\u00e4chst zwee bis dr\u00e4i Deeg eng fiabel Previsioun erauszefilteren.”<\/em><\/p>\n

Allgemeng h\u00e4tt ee bei eis an der Regioun bei de Previsiounen awer eng “relativ gutt an akzeptabel Zouverl\u00e4ssegkeet”<\/em> bis zum dr\u00ebtten Dag, woub\u00e4i d’Viraussoen doriwwer eraus mat der Z\u00e4it \u00ebmmer m\u00e9i onzouverl\u00e4sseg ginn.<\/p>\n

Op der Meteo-S\u00e4it vun RTL.lu <\/a>ass dow\u00e9inst och eng detaill\u00e9iert Wiederprevisioun iwwer dr\u00e4i Deeg ze gesinn, awer just eng m\u00e9i generell Vue op d\u00e9i n\u00e4chst f\u00ebnnef Deeg, w\u00e9i de Meteorolog Fabian Ruhnau vu Kachelmannwetter erkl\u00e4ert. D’Donn\u00e9e vun den diversen Wiederstatiounen, d\u00e9i Kachelmannwetter zu L\u00ebtzebuerg bedreift, fl\u00e9issen och an d’Wiederprevisioune vun RTL mat an.<\/p>\n

Si verschidde Wiederphenomener m\u00e9i einfach virauszesoe w\u00e9i anerer?<\/p>\n

Och heirop kann een dem MeteoLux-Expert no keng pauschal \u00c4ntwert ginn. Fir d\u00e9i am Verglach relativ kleng Surface vu L\u00ebtzebuerg ass et allgemeng awer m\u00e9i einfach, groussfl\u00e4cheg Wiederphenomener virauszesoen – zum Beispill eng H\u00ebtztwell – , w\u00e9i m\u00e9i lokal\u00a0Wiederphenomener w\u00e9i Stuerm, Wand oder och Kn\u00ebppelsteng. M\u00e4 och d\u00ebs Previsiounen hunn hir Limitten.<\/p>\n

Schonn an der Woch viru leschtem D\u00ebnschdeg, wou de Quecks\u00eblwer plazeweis op bal 39 Grad geklommen ass, hat den \u00cbmweltminist\u00e8re an engem Schreiwes un d’Press geschriwwen: “Les pr\u00e9visions m\u00e9t\u00e9orologiques annoncent des temp\u00e9ratures au-dessus de 30\u00b0C durant les deux semaines \u00e0 venir, ainsi qu’une absence de pr\u00e9cipitations.”<\/em><\/p>\n

D\u00ebse Saz wier esou awer “faktesch net korrekt”<\/em> gewiescht, erkl\u00e4ert de Mathias. D’Previsiounen h\u00e4tten dat “esou ni uginn”<\/em>, respektiv et h\u00e4tt nach signifikant Ons\u00e9cherheete fir d\u00e9i zweet Woch ginn. Zwar k\u00e9int een H\u00ebtztwellen dacks m\u00e9i zouverl\u00e4sseg viraussoe w\u00e9i aner extrem Wiederphenomener, an och Dr\u00e9cheperiode k\u00e9inte schonn emol op f\u00ebnnef bis siwen Deeg virausgesot ginn, mee d\u00ebst g\u00e9if eben och \u00ebmmer staark vun der der Stabilit\u00e9it an der Komplexit\u00e9it vun der Grousswiederlag ofh\u00e4nken.<\/p>\n

\"RTL\" D’Pompjee\u00eb l\u00e4schen e Feier, dat op engem Feld t\u00ebscht Schrondweiler a Schieren ausgebrach war. (19. Juli 2022) \/ \u00a9 Ketty a Rom Hankes<\/p>\n

Wat d\u00e9i schl\u00ebmm Iwwerschwemmungen am Juli 2021 zu L\u00ebtzebuerg, an D\u00e4itschland, an an der Belsch ugeet, esou h\u00e4tt een deemools scho ronn zwee bis dr\u00e4i Deeg am Virfeld relativ zouverl\u00e4sseg soe k\u00ebnnen, datt eng Dauerreensituatioun op d’Land g\u00e9if duerkommen. Zu den tats\u00e4chleche Quantit\u00e9iten u Reen, d\u00e9i op d’Land k\u00e9inten erofprasselen, gouf et awer nach bis kuerz virdrun “zimmlech signifikant Ons\u00e9cherheeten”.<\/em><\/p>\n

“A punkto Dauerreen, deen oft mat enger quasi-station\u00e4rer Front zesummenh\u00e4nkt, k\u00ebnne kleng Ver\u00e4nnerunge vun der Verlagerung vun der Front par Rapport zu der Previsioun e groussen Impakt op d’Reenquantit\u00e9ite fir L\u00ebtzebuerg hunn, well eist Land eben esou kleng ass”, <\/em>erkl\u00e4ert de Luca Mathias.<\/p>\n

\"RTL\" D’H\u00e9ichwaasser zu Iechternach um 15. Juli 2021. \/ \u00a9 RTL-Archiv<\/p>\n

Et g\u00ebtt ee waarme Summer, een naasse Wanter – kann een dat pauschal viraussoen?<\/p>\n

Bei esou Viraussoen handelt et sech net \u00ebm klassesch Wiederprevisiounen, mee \u00ebm saisonal Tendenzen, w\u00e9i de Meteorolog vun der nationaler Wiederagence erkl\u00e4ert. Dob\u00e4i ginn deemno net d’Wiederverleef simul\u00e9iert, mee et ginn Anomali\u00eb vun enger best\u00ebmmter Period – sief et e Mount oder eng Saison – am Verglach zu enger klimatologescher Referenzperiod \u00ebnnersicht.<\/p>\n

Besonnesch fiabel wieren d\u00ebs Modeller awer net onbed\u00e9ngt, och wa se engem Indikatioune k\u00ebnne ginn. “Fir de Summer d’lescht Joer louchen\u00a0d’Tendenze gr\u00e9isstendeels dernieft, fir de Summer d\u00ebst Joer hu se bis dato eng gutt Indikatioun geliwwert”<\/em>, esou de Luca Mathias. Allgemeng wiere saisonal Tendenze fir de Wanter m\u00e9i zouverl\u00e4sseg virauszesoen, w\u00e9i fir de Summer, well d\u00e9i saisonal Wiedermodeller zum Beispill Donnerwiederen net esou gutt a Betruecht z\u00e9ie k\u00e9inten.<\/p>\n

W\u00e9i huet sech d’Zouverl\u00e4ssegkeet vun de Previsiounen iwwert d\u00e9i lescht Jore ge\u00e4nnert a w\u00e9i ginn d’Prognose gemaach?<\/p>\n

<\/b><\/b> An de leschten 30 Joer sinn d’Wiedermodeller, op d\u00e9i sech d’Previsioune bas\u00e9ieren, \u00ebmmer m\u00e9i pr\u00e4zis a m\u00e9i performant ginn. Eng Grafik vum Europ\u00e4eschen Zenter fir m\u00ebttelfristeg Wiederprevisiounen (ECMWF) stellt d\u00ebs Evolutioun kloer duer. Fir d\u00e9i n\u00ebrdlech Hemisph\u00e4r ass eng 5-Deeg-Previsioun haut ongef\u00e9ier esou zouverl\u00e4sseg, w\u00e9i eng Previsioun iwwer just dr\u00e4i Deeg am Joer 1995. Eng Previsioun iwwer siwen Deeg ass elo ongef\u00e9ier esou genee, w\u00e9i et virun 20 Joer eng Virausso iwwer f\u00ebnnef Deeg war.<\/p>\n

\"RTL\" D’Treffs\u00e9cherheet a Prozent vum deterministesche Modell vun der EMCF fir d’Str\u00e9imung a ronn 5,5 Km H\u00e9icht. Evolutioun iwwer Z\u00e4it. \/ \u00a9 ECMWF<\/a><\/p>\n

“An de leschten 30 Joer goufen immens grouss Fortschr\u00ebtter gemaach, sief et a punkto Rechekapazit\u00e9it vun de Supercomputeren, mat der Assimilatioun vu Wiederobservatioune ronder\u00ebm de Globus oder och am Allgemenge mat der Opl\u00e9isung an de physikalesche Parametris\u00e9ierungen innerhalb de Wiedermodeller”<\/em>, erkl\u00e4ert de Luca Mathias.<\/p>\n

“D’Treffs\u00e9cherheet vun de Wiederprevisiounen ass vill besser ginn, och wann een dat dacks anescht h\u00e9iert”<\/em>, seet och de Fabian Ruhnau vu Kachelmannwetter. Viru 40 Joer wiere souguer Previsioune fir den n\u00e4chsten Dag dacks nach ons\u00e9cher gewiescht, haut k\u00e9int een d’Temperature fir den n\u00e4chsten Dag meeschtens op 1 Grad genee viraussoen.<\/p>\n

Den nationale Wiederd\u00e9ngscht MeteoLux berechent keng eege Wiedermodeller, mee benotzt d\u00e9i vun den Nopeschl\u00e4nner D\u00e4itschland a Frankr\u00e4ich an och Holland mat. D\u00ebs h\u00e4tten d\u00e9i l\u00ebtzebuergesch Topographie gutt integr\u00e9iert, esou datt d’Land net onbed\u00e9ngt en eegene h\u00e9ichopl\u00e9isende Wiedermodell br\u00e4icht. Och d’Modeller vun dem Europ\u00e4eschen Zenter fir m\u00ebttelfristeg Wiederprevisioune gi bei de Viraussoen consider\u00e9iert.<\/p>\n

De Wiedermodell vu Kachelmannwetter deelt de Grand-Duch\u00e9 iwwerdeems h\u00e9ichopl\u00e9isend an ee Raster vun 1×1 Kilometer an. An d’Previsioune fl\u00e9issen och d’Donn\u00e9e\u00ebn aus Reen-Radaren, vu Satellittebiller a vun iwwer 30 Wiederstatiounen zu L\u00ebtzebuerg mat an. D’Topographie vu L\u00ebtzebuerg g\u00e9if derfir suergen, datt et am S\u00fcden an am Norde vum Land dacks \u00ebnnerschiddlech Wiederlage ginn, esou de Fabian Ruhnau vu Kachelmannwetter. Esou wier et am Norden zum Beispill dacks e b\u00ebsse m\u00e9i verreent, well d’Wolleken an de Bierger vun den Ardenne g\u00e9ifen h\u00e4nke bleiwen.<\/p>\n

Fazit<\/p>\n

W\u00e9i zouverl\u00e4sseg eng Wiederprevisioun wierklech ass, h\u00e4nkt vun enger Rei Faktoren of. E\u00a0stabilt H\u00e9ichdrockgebitt ass zum Beispill m\u00e9i einfach ze berechnen, w\u00e9i Stierm, bei deenen een dacks kuerz virdrun nach net genee soe kann, ob se laanscht z\u00e9ien, oder w\u00e9i staark se wierklech w\u00e4erte ginn. Allgemeng\u00a0si Wiederprevisiounen op dr\u00e4i Deeg gesinn awer zimmlech fiabel.<\/p>\n

En Ausbl\u00e9ck dorop, ob den n\u00e4chste Summer besonnesch waarm oder de Wanter besonnesch\u00a0kal g\u00ebtt, k\u00ebnne Wiederprognosen iwwerdeems net ginn. D\u00ebst\u00a0si saisonal Tendenzen, d\u00e9i awer dacks net besonnesch zouverl\u00e4sseg sinn.<\/p>\n

Allgemeng kann een awer soen, datt sech an de leschten 30 Joer op dem Gebitt vun de Wiederprevisiounen onheemlech vill gedoen huet. Mat moderne\u00a0Supercomputere loosse sech haut Berechnunge maachen, vun deenen een nach an den 90er\u00a0Jore just h\u00e4tt k\u00ebnnen dreemen.<\/p>\n

Hutt Dir Froen oder Ureegunge fir aner Themen, m\u00ebllt Iech \u00ebnner faktencheck@rtl.lu<\/a><\/em>.<\/p>\n

Links<\/p>\n