E Bild, dat a Sozialen Netzwierker Dausende vun Interaktiounen provozéiert huet, weist den Donald Trump ëmgi vu laachende schwaarze Fraen an Oweskleeder. Dëst Bild ass awer net echt – et gouf mat kënschtlecher Intelligenz erstallt. D’Autorin vum Bäitrag huet zouginn, dass si dëse Bäitrag erstallt hat, fir de republikanesche Kandidat ze ënnerstëtzen. En Expert fir Digital Forensik huet och erkläert, dass eng Rëtsch Onreegelméissegkeeten dorop hindeiten, dass dëst Bild net authentesch wär.
“Si hu fäerten, dass schwaarz Fraen den Trump ënnerstëtzen, well wa mir dat maachen, loosse mir d’Gangsterbraut-Nummer hannert eis, a Lénker haasse stilvoll Fraen!”, steet an engem Post vun der Sharika Soal vum 3. August 2024 op der Plattform X. D’Soal ass eng Podcast-Moderatorin a Content-Creatorin fir Gateway Pundit – eng Internetsäit, déi vun der AFP schonn e puermol iwwerpréift gouf.
Dat selwecht Bild war och op Facebook am Ëmlaf an huet eng Rëtsch Interaktiounen ausgeléist.
© AFP
E puer Notzerinnen an Notzer hunn Onstëmmegkeeten am Bild bemierkt, déi dorop hindeiten, dass et vun enger KI gemaach gouf.
Zum Beispill schéngt den Trump e laangen däischteren Hoerkamp ze hunn, deen him aus dem Hannerkapp wiisst. Hien an e puer Fraen op der Foto hunn deforméiert oder zousätzlech Fangeren. Bei enger vun de Frae läit eng Hand op der Schëller, déi kenger vun den anere Figuren op der Foto gehéiere kann, ausserdeem schéngen d’Gesiichter vun de Frae bal identesch ze sinn.
Et gouf awer och Notzerinnen an Notzer op X, déi gegleeft hunn, dass dëst Bild echt wär.
© AFP
D’Sharika Soal huet géintiwwer der AFP confirméiert, dass d’Bild mat KI hiergestallt gouf, fir den eemolegen US-President ze ënnerstëtzen.
“Jo, et ass eng grafesch Duerstellung dovun, wat ech geschriwwen hunn”, huet si an enger E-Mail vum 7. August 2024 geschriwwen. “Elegant, modest gekleet schwaarz Fraen ënnerstëtzen den Donald Trump. Ech hunn e puer KI-Biller vum Hulk Hogan a Moud am Stil vun den 1950er Jore gepost, fir d’Tweets ze illustréieren. Dat ass näischt, wat ech nach ni virdru gemaach hunn oder wat nach net zu mengem übleche Contenu passt, dee sech op schwaarz Fraen a konservativ Politik konzentréiert.”
Och duerch e forenseschen Tool, dee vu GetReal Labs entwéckelt gouf, konnt festgestallt ginn, dass d’Bild gefälscht ass.
“Eis KI-Modeller, déi dorop trainéiert sinn, opfälleg Musteren a KI-generéierte Biller ze erkennen, kennzeechnen dëst Bild als KI”, huet den Hany Farid, Professer op der University of California-Berkeley a Matgrënner vu GetReal, an enger E-Mail vum 8. August 2024 geschriwwen.
“Ausserdeem si verréideresch Zeeche vun deforméierten Hänn ze erkennen. D’Fra riets vum Trump huet en zousätzleche Fanger an hien huet eng verstümmelt Hand op senge Schëlleren. D’Käpp an d’Täsch um Trump senger Jackett sinn och verformt.”
D’KI-Bild ass dat neist an enger Rei, déi den Trump mat Afroamerikanerinnen an -amerikaner weist – en Deel vun der Bevëlkerung, ëm deenen hir Ënnerstëtzung de republikanesche Kandidat kämpft.
© AFP
© AFP
E Bericht vum Pew Research Center vum Juni 2021 huet erginn, dass just 8 Prozent vun der schwaarzer Wielerschaft den Trump bei de Walen 2020 ënnerstëtzt hunn – en Trend, dee sech ze ännere geschéngt hat, éier de President Joe Biden seng Kandidatur fir en zweet Mandat zeréckgezunn a seng Vizepresidentin Kamala Harris am Juli 2024 ënnerstëtzt huet.
D’AFP huet eng Rëtsch Artikelen zum Sujet Desinformatioun an der US-Politik geschriwwen.
Fazit: D’Bild, dat d’Sharika Soal gedeelt huet, gouf mat KI erstallt an ass soumat net echt. Ofgesinn dovun, dass si dat confirméiert huet, deiten och eng Rëtsch Onstëmmegkeeten um Bild dorop hin.
Dësen AFP-Artikel gouf vun RTL op Lëtzebuergesch iwwersat.
