Eng méiglech Aféierung vum digitalen Euro gëtt aktuell gepréift. Zu dësem Sujet sinn och Behaaptungen am Ëmlaf, ënner anerem, dass dat am Oktober 2025 geschéie wäert an d’Ofschafung vum Boergeld ustoe géif.
Doduerch géif d’EU och Zougang zu privaten Erspuernesser kréien, heescht et a Sozialen Netzwierker. A Wierklechkeet soll den digitalen Euro just ergänzen, net ersetzen, sou Fachleit. Eng Aféierung vum digitalen Euro virun 2027 wär ausserdeem “onwarscheinlech”.
Wéi Boergeld, just digital – den digitalen Euro soll Geld vun der Europäescher Zentralbank an elektronescher Form zur Verfügung stellen. Wéi dat an der Praxis konkreet ëmgesat gi soll, doru schafft d’Europäesch Zentralbank (EZB) am Moment an enger interner Virbereedungsphas aus. Wéi d’Presidentin Christine Lagarde op enger Pressekonferenz de 6. Mäerz 2025 matgedeelt huet, soll dës Phas am Oktober 2025 ofgeschloss ginn.
E Clip vun dëser Pressekonferenz mécht am Internet d’Ronn. “DIGITALEN EURO KËNNT VUM OKTOBER 2025 UN”, housch et dozou an enger Rëtsch Bäiträg, zum Beispill op Threads den 9. Mäerz 2025.
Dës Ausso gouf der Lagarde zougeschriwwen, obwuel d’EZB-Presidentin dëse Saz am gedeelte Clip ni ernimmt. D’Behaaptung gouf den 11. Mäerz 2025 och vum éisträicheschen EU-Deputéierten Harald Vilimsky (FPÖ) verbreet. En dacks gedeelte Facebook-Bäitrag huet den 12. Mäerz 2025 virun der “Ofschafung vum Boergeld” duerch den digitalen Euro gewarnt. Eng Behaaptung, déi d’AFP sou änlech schonn an der Vergaangenheet widderluecht huet.
Och eng kierzlech Ausso vun der EU-Kommissiounspresidentin Ursula von der Leyen den 10. Mäerz 2025 op der Plattform X gouf mam digitalen Euro a Verbindung bruecht an huet am Internet fir Opreegung gesuergt. “Firwat den digitalen Euro schonn am Hierscht komme soll?”, hunn eng Abberzuel User den 12. Mäerz 2025 gefrot. Hir Schlussfollgerung: Well d’EU “un d’privat ERSPUERNESSER vun de BIERGER wëll”.
© AFP
Souwuel d’Ausso vun der Lagarde op der Pressekonferenz de 6. Mäerz 2025 wéi och den X-Bäitrag vun der von der Leyen goufen aus dem Kontext gerappt an ierféierend interpretéiert.
Virbereedungsphas fir digitalen Euro am Oktober 2025 eriwwer
D’EZB hat de 6. Mäerz 2025 d’Press invitéiert, wat am Virfeld scho vill diskutéiert gi war. D’Entscheedung fir eng weider Zënssenkung sollt nämlech matgedeelt ginn. Wéi erwaart, huet d’EZB de Leetzëns op 2,5 Prozent erofgesat.
© AFP
No der Annonce ware Froen zougelooss. Eng dovu war, e bëssen nieft dem Haaptsujet: “Wéi kann d’EZB d’Kreatioun vun engem digitalen Euro undreiwen?” D’Fra, déi d’Fro gestallt hat, huet dobäi ernimmt, dass den US-President Donald Trump d’Pläng fir eng digital Wärung op Äis geluecht huet. Doropshin huet d’Lagarde op Englesch geäntwert, si géif hoffen, dass “mir dësen digitalen Euro um Enn net begruewen, mee realiséiere kënnen”. Duerno huet si vun enger “Deadline” am Oktober 2025 geschwat, fir déi ee sech “prett” maache géif. Gläichzäiteg huet d’Lagarde ugemierkt: “Mir wäerten net kapabel sinn, virunzekommen, wa […] Kommissioun, Rot a Parlament – d’Gesetzgeebungsprozedur net ofschléissen, ouni dee mir net virukomme kënnen.”
Den Originalwuertlaut ass op der Internetsäit vun der EZB nozeliesen souwéi op YouTube nozelauschteren.
Wéi d’EZB den 13. Mäerz 2025 op hirem X-Account geschriwwen huet, huet et sech bei der Deadline awer just ëm den Ofschloss vun enger Virbereedungsphas gehandelt, déi am November 2023 gestart gi war. Dës geet wéi geplangt no zwee Joer am Oktober 2025 op en Enn, duerno steet d’Entscheedung vum EZB-Rot fir eng nächst Etapp un. Den ieweschten Decisiounsgremium vun der EZB kéint uschléissend d’Reegelwierk fir en digitalen Euro publizéieren, dat zum Beispill e Maximum, wéi vill Suen een digital halen däerf, definéiert souwéi d’Fro kläert, wéi vill Wallets, also digital Portmonnien, eng Persoun besëtzen däerf. De kompletten Zäitplang fir den digitalen Euro ass op der EZB-Websäit ze fannen. D’Lagarde huet also just dat confirméiert, dass d’EZB dësen Zäitplang anhale wäert.
An engem Interview mat der Norichtenagence “Reuters” vum 6. Februar 2025 sot de Piero Cipollone, Member vun der EZB-Direktioun, dass et “net laang” dauere géif, bis d’Reegelwierk fir den digitalen Euro fäerdeggestallt gi kéint, soubal eng Gesetzespropos dozou ugeholl géif. Déi meescht EU-Dispositioune gi gemeinsam vum EU-Parlament a vum Rot vun der EU votéiert, baséierend op enger Propos vun der EU-Kommissioun.
Den Alexandre Stervinou, bei der franséischer Nationalbank “Banque de France” fir d’Opsiicht vu Finanztransaktiounen zoustänneg, sot den 13. Mäerz 2025 géintiwwer der AFP: “Fir enges Daags en digitalen Euro erausginn ze kënnen, wäerte mir eng Rei Jore brauchen, fir dat ze erreechen.” E géif net viru Mëtt 2027 oder 2028 konkreet ëmgesat kënne ginn. An: Bis en ageféiert wär, kéint et “zum Beispill bis 2030” daueren. D’Wierder vun der Lagarde wäre feelinterpretéiert ginn.
Boergeld bleift gesetzlecht Bezuelmëttel am Euroraum
“Boergeld gëtt net ofgeschaaft”, housch et de 14. Mäerz 2025 aus der Éisträichescher Nationalbank géintiwwer der AFP. An Éisträich ass Boergeld dat beléiftst Mëttel, fir ze bezuelen. Weider: “Keen am Euroraum denkt dorun, d’Boergeld ofzeschafen.” De Géigendeel wär de Fall, d’Euroschäiner kréiche souguer en neien Design. Eng Aféierung vum digitalen Euro virun 2027 oder 2028 wär par conter “onwarscheinlech”, housch et.
No der Privatsphär beim Bezuele mam digitalen Euro gefrot sot de Spriecher, dass Transaktiounen anonymiséiert wäerte sinn. Dat géif bedeiten, dass d’EZB d’Persoun hannert dem Bezuelvirgang net identifizéiere kënne wäert. Se géif och net wësse kënnen, wien en digitale Wallet hätt.
D’Gesetzespropos vun der Europäescher Kommissioun fir den digitalen Euro ass Deel vun engem Pak. Am Juni 2023 hat d’Kommissioun zwou Propose virgeluecht, fir “d’Méiglechkeet, Boergeld ze benotzen” weider ze garantéieren an e “rechtleche Kader fir en digitalen Euro” ze schafen. D’EU-Kommissioun erwaart, wéi si der AFP den 13. Mäerz 2025 matgedeelt huet, dass eng Eenegung op e “gemeinsamen Zougang” fir e rechtleche Kader nach dëst Joer méiglech ass. “Den digitalen Euro huet och Virdeeler fir d’strateegesch Autonomie vun Europa, besonnesch wat d’haiteg grouss Ofhängegkeet vun auslännesche Bezuelsystemer betrëfft”, huet e Kommissiouns-Spriecher weider geschriwwen.
Dem Johannes Flume, Professer op der Paris Lodron Universität Salzburg an Expert fir Devisërecht, no stinn d’Zeechen net an d’Richtung, dass den digitalen Euro deemnächst komme wäert. Dorop musse sech de Rot vun der EU, d’Parlament souwéi d’Kommissioun eréischt eenegen. Grondsätzlech wär dovun auszegoen, dass de virgeluechte Pak souwuel Reegele fir den digitalen Euro wéi och fir d’Ofséchere vum Boergeld ëmfaasse wäert. Well d’erkläert Zil wär och, dat physescht Boergeld als am Moment eenzegt gesetzlecht Mëttel, fir ze bezuelen, am Euroraum ofzesécheren.
Mee dem Expert no kéint dat zu Schwieregkeeten an der Praxis féieren. Well EU-Richtlinnen an alle Memberstaate gëllen, missten op der anerer Säit Länner wéi zum Beispill Holland, an deene léiwer mat Kaart bezuelt gëtt, “Entreprisen dozou bréngen, nees Boergeld ze akzeptéieren”. Eng vun de wichtegsten Entscheedungen, déi dem Flume no vun den Institutioune beäntwert gi misst, wär, awéiwäit “den Eenzelhandel an den Allgemenge Geschäftsbedéngungen (fr. Conditions générales) Boergeld refuséieren däerf”. “Hei sollt ee restriktiv virgoen”, sou de Flume an engem Telefonat vum 14. Mäerz 2025, well “just sou d’inklusiv Wierkung an Akzeptanz vum Boergeld am deegleche Liewen ofgeséchert gi” kéint. D’dozougehéiereg Verhandlungsronne kënne “laang daueren”.
Wärend Butteker am Moment net verflicht sinn, bezuele mat Kaart ze akzeptéieren, musse se grondsätzlech Euro a Boergeld unhuelen. Un dëser Akzeptéierungsflicht ännert d’Aféiere vum digitalen Euro näischt. D’Boergeld ass gesetzlech ofgeséchert, zum Beispill am Vertrag iwwer d’Aarbechtsmanéier vun der Europäescher Unioun (AEUV). “Duerch e Gesetz vun der EU kann net d’Virschrëft vum Art. 128 Abs. 1 Satz 3 AEUV geännert ginn, no deenen d’Euro-Schäiner déi eenzeg Schäiner sinn, déi an der Unioun als gesetzlecht Bezuelmëttel gëllen”, huet de Christoph Ohler, Professer fir Ëffentlecht Recht an Europarecht op der Friedrich-Schiller-Universität Jena geschriwwen. Den Direkter vum Center for European Studies op der selwechter Universitéit huet weider gemengt: “Geneesou wéineg” kéint dëst Gesetz d’Recht vun de Memberstaate beschneiden, Euro-Mënzen erauszeginn. Ausserdeem stéingen dem Ohler no enger Ofschafung vun de gesetzleche Bezuelmëttel an Däitschland zousätzlech “grondrechtlech Limitten” am Wee.
“Den digitalen Euro wäert net dofir do sinn, d’Boergeld ze ersetzen”, huet de Stervinou vun der franséischer Nationalbank zesummegefaasst. Hie géif hoffen, “dass den digitalen Euro am digitale Raum ongeféier de selwechte Bedarf wéi d’Boergeld decke kann – nieft anere Bezuelinstrumenter”.
Kommissioun äussert sech zu von der Leyen-Bäitrag
An engem Bäitrag op X vun der EU-Kommissiounspresidentin Ursula von der Leyen housch et den 10. Mäerz 2025 iwwersat: “Mir wäerte privat Erspuernesser an dréngend benéidegt Investitiounen ëmwandelen.” Ausserdeem hat hir Social-Media-Ekipp e Video eropgelueden, an deem ënner anerem d’Christine Lagarde ze gesinn ass. “Dowéinst och d’Ofschafe vum Boergeld”, hat eng Userin dozou den 12. Mäerz 2025 op Facebook behaapt. Mam digitalen Euro “kënnt ee méi séier un d’Erspuernesser vun de Bierger”, housch et fälschlech an dësem Kommentar.
An engem Statement huet sech d’Kommunikatiounsekipp vun der Kommissioun de 17. Mäerz 2025 op Nofro och zu dësem Sujet geäussert. D’von der Leyen huet deemno dorop higewisen, dass “den EU-Biergerinnen a -Bierger méi Méiglechkeeten offréiert gi sollen, wa si hir Erspuernesser op den EU-Kapitalmäert investéiere wëllen”. Dës Bestriewunge wären de Kär vum Gesamtkonzept fir d’Spuer- an Investitiounsunioun (SIU). D’Zil wär, “d’Bedeelegung vun de Biergerinnen a Bierger un de Kapitalmäert […] ze erhéijen”. Allerdéngs: “D’EU wäert d’Biergerinnen a Bierger op kee Fall zu Investitiounen op de Kapitalmäert zwéngen.” D’SIU hätt als Zil, “e méi gënschtegt Ëmfeld fir déijéineg ze schafen, déi investéiere wëllen”.
Fazit: A Sozialen Netzwierker hu sech Behaaptunge verbreet, dass den digitalen Euro am Oktober 2025 ageféiert géif, deen d’Ofschafe vum Boergeld bedeite géif. Dozou goufen Aussoe vun der EZB-Presidentin Christine Lagarde an der EU-Kommissiounspresidentin Ursula von der Leyen aus dem Kontext gerappt an ierféierend interpretéiert. Am Hierscht 2025 steet eréischt den Ofschloss vun enger Virbereedungsphas vum Projet un, net d’Aféiere vum digitalen Euro. Experten no bleift d’Boergeld weiderhin e gesetzlecht Bezuelmëttel.
Dësen AFP-Artikel gouf vun RTL op Lëtzebuergesch iwwersat.
