Den éischte Schratt vun engem Mënsch um Mound ass 55 Joer hier – Konspiratiounstheorien, dass d’Moundlandung guer net stattfonnt hätt, wëllen awer net ophalen.
Sou war am Mäerz 2025 op en Neits e Video am Ëmlaf, an deem behaapt gëtt, de Schongofdrock um Mound géif net zur Suel vum Astronautekostüm vum Neil Armstrong, dem éischte Mann um Mound, passen. De Verglach ass awer ierféierend. D’Astronauten haten deemools en zweet Puer Schong un, dat zeréckgelooss gouf, fir op der Réckrees Gewiicht ze spueren.
“Den éischte FOUSSOFDROCK um Mound”, housch et an engem Facebook-Bäitrag vum 28. Mäerz 2025. Duerno koumen eng Rei Laach-Emojien, déi de Contenu anscheinend als onglafwierdeg duerstelle sollen. Ausserdeem gouf e Video gedeelt, an deem den Astronautekostüm vum Neil Armstrong an eng Foto vu sengem Schongofdrock um Mound ze gesi sinn. De Video suggeréiert: De Profil vum Schong géif net zum Ofdrock passen, deen hie bei der éischter Moundlandung hannerlooss hätt – ob se stattfonnt huet, wär also ze bezweiwelen.
Dës Behaaptung kënnt ëmmer nees op. Och 2022 an 2023 gouf se schonn a Sozialen Netzwierker wéi Telegram a Facebook gedeelt. Am Mäerz 2025 war se och op Franséisch am Ëmlaf.
© AFP
Verschidde Medien, dorënner d’AFP, hunn awer beluecht, dass de Video ierféierend ass, well doran net genannt gëtt, dass Astronauten um Mound e weidert Puer Schong unhaten.
Astronautekostüm ass am Musée ausgestallt
Den Neil Armstrong war den éischte Mann, deen e Fouss Mound wärend der Apollo-11-Missioun am Joer 1969 gesat huet. Un der Missioun bedeelegt waren nieft dem Armstrong och de Buzz Aldrin an de Michael Collins. Zesummegefaasst ass d’Missioun op der Internetsäit vun der amerikanescher Raumfaartagence NASA.
Mat Hëllef vun enger ëmgekéierter Billersich huet d’AFP erausfonnt, vu wou d’Foto vum Astronautekostüm staamt, déi am Video benotzt gëtt. D’Foto gouf vum amerikaneschen Astronom Phil Plait geschoss an ass am Juli 2015 an engem Artikel vum US-Magasinn “Slate” publizéiert ginn. Dora gëtt en Opruff ernimmt, Mëttel fir d’Erhale vum Astronautekostüm vum Neil Armstrong duerch den nationale Loft- a Raumfaartmusée vum Smithsonian-Institut zu Washington DC ze sammelen.
© AFP
Eng Sich no der Foto vum Schongofdrock am gedeelte Video hat och Erfolleg. Den Ursprong ass op der Internetsäit vun der amerikanescher Nationaler Konschtgalerie ze fannen. Der Bildbeschreiwung no weist se e Schongofdrock vum Buzz Aldrin, ee vun den Astronauten, déi mam Neil Armstrong op der Apollo-11-Missioun waren.
© AFP
D’Cathleen Lewis, Spezialistin fir d’Konservéierung vun Astronautekostümer am nationale Loft- a Raumfaartmusée vum Smithsonian-Institut, hat schonn am Mäerz 2021 géintiwwer der AFP erkläert, dass et en einfache Grond dofir gëtt, dass de Schongofdrock an d’From vun der Suel vum Kostüm am ierféierende Video net iwwereneestëmmen: den Neil Armstrong an de Buzz Aldrin haten um Mound en zweet Puer Schong un, deenen hir Suel sech vun de Schong vum Astronautekostüm ënnerscheet huet.
“All zwielef Apollo-Astronauten, déi op der Mounduewerfläch gelaf sinn, hate Moundiwwerschong un”, huet d’Lewis erkläert a bäigefüügt, dass “dës grouss Stiwwele mat bloe Silikonsuelen ausgerëscht waren, déi den ikoneschen Ofdrock am Moundstëbs hannerlooss hunn”.
Dës Iwwerschong “goufen entwéckelt, fir den Apollo-Astronaute besseren Halt am Stëbs ze erméiglechen”. Ausserdeem hate si “zousätzlech Schichten aus wäissem Beta-Stoff an dënn Schichte vun Isolatiounstextilien, fir zousätzleche Schutz géint ongefiltert Sonnestralung ze bidden”, huet d’Lewis weider erkläert.
D’NASA weist op hirer Internetsäit Fotoe vun der Missioun Apollo 11. Op enger vun dëse Fotoe klëmmt de Buzz Aldrin grad aus der Moundlandekapsel eraus. Dobäi sinn d’Suele vun den Iwwerschong ze gesinn. Se passen zu der Beschreiwung vun der Lewis a stëmmen och mam Schongofdrock am ierféierende Video iwwereneen.
© AFP
An engem aneren Dokument op der Websäit vum Loft- a Raumfaartmusée ass e Bild ze gesinn, dat duerch Funk iwwermëttelt gouf an och d’Iwwerschong weist, déi bei dëser Raumfaartmissioun genotzt goufen. Dorop ass hire Profil ze erkennen, deen dem Schongofdrock am ierféierende Video entsprécht.
Den Astronautekostüm gëtt am Raumfaartmusée zu Washington DC ouni Iwwerschong ausgestallt, well den Neil Armstrong an de Buzz Aldrin se um Mound zeréckgelooss hunn. Dat geet aus enger Rëtsch Artikelen iwwer d’Missioun ervir, wéi beispillsweis aus engem Text vum Magasinn “Smithsonian”. D’Astronauten hate se “aus Grënn wéinst dem Gewiicht fir hire Retour” zeréckgelooss, huet d’Lewis erkläert.
“D’Iwwerschong an aner Ausrëschtung goufen als Ballast gewäert”, huet si matgedeelt. “All Gramm, deen d’Astronauten op der Mounduewerfläch loosse konnten, huet en zousätzleche Gramm Moundprouwe bedeit, dee si mathuele konnten.”
Echtheet vu Raumfaartmissioun gëtt reegelméisseg ugezweiwelt
Falschinformatiounen iwwer Raumfaartmissiounen oder d’éischt Schrëtt vu Mënschen um Mound sinn trotz groussen Dokumentatioune vun den Evenementer ëmmer nach a Sozialen Netzwierker am Ëmlaf. E puer dovu goufe scho vun der AFP – dacks op Franséisch – widderluecht.
© AFP
Am Januar 2024 gouf annoncéiert, dass sech d’Missioun Artemis 3 – déi Astronauten eng éischt Kéier zënter dem Enn vum Apollo-Programm am Joer 1972 op de Mound brénge soll – verréckelt an net wéi geplangt am Joer 2024 starte kann. Kuerz drop hunn Notzer vu Sozialen Netzwierker beispillsweis d’Echtheet vun de bemannte Moundmissioune vun der NASA tëscht 1969 an 1972 a Fro gestallt a sech dobäi op eng feelerhaft Logik gestäipt, wéi d’AFP erkläert huet.
Engem weideren AFP-Faktencheck no goufen am Summer 2023 Biller vun der Moundlandung vun der indescher Sond Chandrayaan-3 aus dem Kontext gerappt: Internetnotzer haten a Bäiträg fälschlecherweis den Androck opkomme gelooss, d’Landung wär inzenéiert ginn.
Am Mee 2024 gouf am Internet nees fälschlech behaapt, den Entwéckler vun der chineesescher Moundsond Chang’e-6 hätt gesot, hien hätt “keng Spuere vun enger Landung um Mound” fonnt. Dobäi waren d’Sonde vun den Apollo-Missioune just op anere Plazen um Mound gelant, wéi d’AFP geschriwwen huet.
Ugangs 2025 haten Internetnotzer doriwwer eraus d’Falschinformatioun verbreet, e Video géif beweisen, dass d’Biller vun der Internationaler Raumstatioun ISS a Studioen op der Äerd gedréit gi wären an hunn dozou en aus dem Kontext gerappten, humoristesche Clip gedeelt. Och dës Behaaptung huet d’AFP widderluecht.
Fazit: E Verglach vum Astronautekostüm vum Neil Armstrong mat engem Schongofdrock um Mound widderleet déi éischt Moundlandung 1969 net. D’Astronaute vun der Apollo-11-Missioun haten Iwwerschong un, deenen hire Profil mam Schongofdrock iwwereneestëmmt. Dat hu souwuel Bildvergläicher wéi och eng Raumfaartexpertin géintiwwer der AFP confirméiert.
Dëse Faktencheck gouf vun RTL op Lëtzebuergesch iwwersat.
