D’Europäesch Zentralbank (EZB) plangt mam digitalen Euro eng zentraliséiert digital Bezuelméiglechkeet. A Sozialen Netzwierker gëtt ëmmer nees fälschlech behaapt, dës Bezuelmethod géif Mesuren, déi d’Fräiheet limitéieren, mat sech bréngen.
Am Summer 2025 gouf en Extrait vun engem Video vun der EZB-Presidentin Christine Lagarde gedeelt, an deem si angeeblech Kontrolle vun den Depensen ukënnegt. D’Opnam ass Deel vun enge Spiicht, déi der Lagarde gespillt gouf. An der Opnam sinn awer keng konkreet Aussoen iwwer den digitalen Euro dran an der Lagarde hir Ausféierunge gi verkierzt erëmginn.
“D’Finanzdiktatur kënnt!”, huet e User an engem X-Bäitrag vum 2. August 2025 geschriwwen. “No der Aféierung vum digitalen Euro sinn Akeef mat Boergeld just nach bis 1.000 Euro méiglech. Wann ee boer bezilt, gëtt dat vun der Héicht vun 300 Euro un automatesch kontrolléiert”, hätt d’Christine Lagarde, Presidentin vun der Europäescher Zentralbank, an engem Livestream gesot.
De User huet ausserdeem e Video gedeelt, an deem d’Lagarde per Videokonferenz mat enger Persoun, déi net am Bild ass, iwwer méiglech Kontrollmoossnamen duerch d’Aféierung vum digitalen Euro ze schwätze schéngt. Dës Behaaptung gouf och op Facebook an Telegram souwéi op Franséisch verbreet. Schonn 2023 war dëse Video am Ëmlaf.
© AFP
Däraarteg Kontrollméiglechkeete sinn de geplangte Mesuren am Entworf vum Dekreet vun der Europäescher Unioun awer net ze enthuelen. Ausserdeem gëtt et am Moment zwar keng Uewergrenz fir Boergeld an Däitschland, d’EU huet allerdéngs onofhängeg vun de Pläng fir den digitalen Euro esou eng Grenz decidéiert, déi 2027 a Kraaft triede soll. Den digitalen Euro befënnt sech doriwwer eraus nach an der Planungsphas – ob en tatsächlech ageféiert gëtt, ass nach net sécher.
Lagarde gouf Affer vu prorusseschem Streech
Eng ëmgekéiert Billersich huet zur ursprénglecher, 20 Minutte laanger Versioun vum Video geféiert, deen ënner dem Titel “Vollstännege Video vun der Spiicht mam Christine Lagarde, Presidentin vun der Europäescher Zentralbank” (“Full video prank with European Central Bank President Christine Lagarde”) de 16. Mäerz 2023 op der russescher Plattform Rutube verëffentlech gouf. Hannert dëser als Interview getarnter Spiicht stiechen déi zwee russesch Satiriker Wladimir Kusnezow an Alexej Stojarow, alias “Wowan” a “Lexus”.
D’Lagarde ass net déi éischt Persoun, déi vun de Satiriker erageluecht gouf. Si hu schonn eng Abberzuel Perséinlechkeeten an d’Fal gelackelt, dorënner de fréiere brittesche Premierminister Boris Johnson, den tierkesche President Recep Tayip Erdogan oder och de franséische President Emmanuel Macron. Och Prominenter wéi de Prënz Harry oder den Elton John goufe scho vun de Satiriker ausgetrickst.
© AFP
Zënter méi wéi engem Joerzéngt hu sech déi zwee Männer dorop spezialiséiert, Perséinlechkeeten ze täuschen, fir si zu sensibelen Äusserungen zu Sujeten ze beweegen, déi als potenziell vertraulech gëllen. D’Clips ginn net just op Rutube verëffentlecht, mee och op der russescher Tëlee diffuséiert. Sou war d’Episod mat der Christine Lagarde de 15. Mäerz 2023 um Pervy Kanal, dem éischte Fernseesender vum Land, ze gesinn.
Am Video gëtt sech ee vu béide Komiker als den ukrainesche President Wolodymyr Selenskyj aus a befreet d’EZB-Presidentin zu verschiddenen Theemen, dorënner d’Aféierung vum digitalen Euro. Dëse wär dem falsche Selenskyj no Géigestand vun “enger Rëtsch Demonstratiounen an Europa”, wat am Joer 2023 awer net de Fall war. “De Problem ass, dass si (net méi no definéiert Persounen oder Organisatiounen, Um. v. d. Red.) net kontrolléiere gi wëllen”, seet de Komiker op Englesch.
Doropshin erënnert d’Lagarde drun, dass Kontrolle fir Boergeldtransaktioune scho bestéingen: “An Europa gëllt eng Uewergrenz vun 1.000 Euro, iwwer déi eraus Dir net boer bezuele kënnt.” Wien dat awer maache géif, géif sech op dem groe Maart befannen – engem parallelle Maart fir Wuerenhandel, dee sech der Kontroll vun den Hiersteller a vum Staat entzitt. “Dir gitt also e Risiko an a wann Dir erwëscht gitt, kritt Dir eng Geldstrof oder musst an de Prisong”, erkläert d’Lagarde.
Cash bezuelen ass an Däitschland net limitéiert
An Däitschland gëllt bis elo keng Uewergrenz fir d’Bezuele mat Boergeld, wéi d’Europäische Verbraucherzentrum Deutschland am Internet erkläert. “Wien awer Beträg iwwer 10.000 Euro boer bezuele wëll, muss sech ausweisen”, heescht et op der Internetsäit. D’Händler mussen dann d’perséinlech Donnéeë vun de Verkeefer offroen a versuergen.
Vun 2027 u soll EU-wäit awer eng Boergelduewergrenz vun 10.000 Euro gëllen. Mam digitalen Euro huet dës Reegelung allerdéngs näischt ze dinn. Se soll der Bekämpfung vu Geldwäsch déngen, hat de Rot vun der EU an engem Pressecommuniqué vum 30. Mee 2024 matgedeelt. Medieberichter no soll dat awer net de Verkaf tëscht zwou Privatpersoune concernéieren, wa keng vu béide berufflech handelt.
D’Uewergrenz vun 1000 Euro fir boert Bezuelen, déi d’Lagarde am Video nennt, gëllt ausserdeem a Frankräich, net an der ganzer Europäescher Unioun. Dës Grenz gouf duerch en Dekreet vum 24. Juni 2015 festgeluecht, dat d’Limitt fir Viremente vun enger Privatpersoun un eng Geschäftspersoun vu virdrun 3.000 Euro op 1.000 Euro erofgesat hat. Wéi d’EZB-Presidentin am Video duerno preziséiert, sinn d’Schwellewäerter vu Land zu Land ënnerschiddlech. Sou sinn an Éisträich, Holland a Finnland keng gesetzlech Uewergrenze fir boert Bezuele virgesinn, wärend Italien, Griicheland a Spuenien déi strengst Beschränkungen hunn.
EZB plangt keng Kontroll vun Depensen
A verschiddene Bäiträg mat der Falschbehaaptung ass ausserdeem dovu rieds, dass boert Bezuelen “vun enger Héicht vun 300 Euro un automatesch kontrolléiert” géif. Zwar schwätzt d’Lagarde am online gedeelte Video am Zesummenhang mam digitalen Euro vu “Kontrollen” an nennt Beträg vun 300 a 400 Euro – si mengt domat allerdéngs, dass d’EZB “e Mechanismus (…) ouni vill Kontrolle” plangt a kee Schwellewäert, vun deem Beträg un an dëser Héicht oder och méi niddreg Zommen iwwerwaacht géifen. Uschléissend féiert d’Lagarde allerdéngs anonym “Prepaid-Kaarten” als Beispill fir méi streng Kontrollen un, mat deenen d’Terroruschléi vun 2015 a Frankräich finanzéiert gi wären.
Weider heescht et an e puer vun den online gedeelte Bäiträg: “A wann en EU-Memberstaat mat engem Virement net averstanen ass, däerf de Bierger dësen eeben net duerchféieren.” Dës Behaaptung entbiert awer all Grondlag. D’EZB leet net fest, wat fir Keef zoulässeg oder verbuede sinn: De Plang vun der EU gesäit kee Mechanismus vir, no deem d’EZB eng Transaktioun opgrond vun hirem Zweck oder vum Kafverhale geneemegen oder ofleene kéint.
D’Europäesch Zentralbank erkläert online, dass den digitalen Euro “ënner kengen Ëmstänn programméierbaart Geld” wär – also eng Zort Bong, deem seng Héicht, Kafgéigestand oder Verwendungszweck begrenzt wären. Der Dekreetspropos vun der Europäescher Kommissioun no, déi dem Europäesche Parlament virgeluecht gouf, géif den digitalen Euro genee engem Euro entspriechen a kéint op déi selwecht Manéier benotzt ginn.
Den digitalen Euro soll och eng “Offline-Funktioun” hunn. Doduerch soll garantéiert ginn, dass d’digital Wärung wéi eng physesch Wärung genotzt gi kann, hat d’EZB an hirem éischte Fortschrëttsbericht vun Abrëll 2024 gemellt, dee sech besonnesch mam Dateschutz bei Bezuelméiglechkeete befaasst huet. Am Fall vun Offline-Paiementer wären d’persounebezunn Donnéeë vun der Transaktioun mam digitalen Euro just deejéinege bekannt, déi de Paiement tätegen an empfänken. Se “géifen net u Bezueldéngschtleeschter, den Eurosystem oder aner ënnerstëtzend Déngschtleeschter weidergi ginn”, heescht et am Bericht.
Schliisslech ernimmt d’Lagarde weeder am gedeelten Extrait nach wärend dem gesamte Video, dass d’EZB déi mam digitalen Euro getätegt Akeef validéiere kéint oder net.
Digitalen Euro ass nach an der Virbereedungsphas
D’Entwécklung vum digitalen Euro ass am Summer 2025 nach an der Virbereedungsphas an déi konkreet Konditioune fir seng Aféierung stinn nach net fest. Eng Entscheedung, ob den digitalen Euro tatsächlech ëmgesat gëtt, ass nach net gefall.
Dem offiziellen Zäitplang vun der EZB no soll déi éischt Reflexiounsphas no zwee Joer am Oktober 2025 ofgeschloss sinn. Da soll de Rot vun der Europäescher Zentralbank zesummekommen, fir iwwer déi nächst Schrëtt ze entscheeden. Wann en den europäesche Gesetzgeebungsprozess erfollegräich duerchleeft, kéint den digitalen Euro vun 2027 oder 2028 un ageféiert ginn, hate Fonctionnairen am Abrëll 2025 géintiwwer der AFP erkläert.
Zulescht hat eng Pressekonferenz vun der EZB-Presidentin am Mäerz 2025 eng Well vu Falschinformatioune mat änleche Behaaptungen iwwer den digitalen Euro ausgeléist, déi d’AFP deemools widderluecht hat. Wärend der Konferenz hat d’Lagarde d’Enn vun der éischter Preparatiounsphas am Oktober 2025 ugekënnegt.
Fazit: D’Presidentin vun der Europäescher Zentralbank Christine Lagarde huet keng Uewergrenz fir boer Paiementer oder eng Kontroll vun Depensen duerch d’Aféierung vum digitalen Euro ugekënnegt. De Video, deen d’Basis fir d’Falschbehaaptung ass, ass en Extrait aus enger Spiicht vun zwee russesche Komiker, dem “Wowan” an dem “Lexus”. D’Lagarde war 2023 op hir Spiicht eragefall. Si schwätzen doran zwar iwwer den digitalen Euro, awer net iwwer Kontrollen oder Limitte fir Paiementer. Den digitalen Euro befënnt sech ausserdeem nach an der Virbereedungsphas, eng Ëmsetzung ass nach net sécher.
Dëse Faktencheck gouf vun RTL op Lëtzebuergesch iwwersat.
