Déi zweetgréisst Stad vu Myanmar Mandalay gouf duerch en déidlecht Äerdbiewen den 28. Mäerz mat am stäerksten zerstéiert.
Mee am Clip, dee weltwäit am Ëmlaf war an angeeblech d’Schied an der Stad weist, stieche visuell Feeler an d’Aen, déi dorop hindeiten, dass e mat Hëllef vu Kënschtlecher Intelligenz erstallt gouf, wéi eng Analys gewisen huet.
“O! Mandalay, et ass, wéi wann d’Stad gefall wär”, heescht et an der burmeesescher Bildënnerschrëft vum Clip, deen een Dag nom Biewen op Facebook gedeelt gi war.
E gouf méi wéi 11.000 Mol opgeruff a weist déi zerstéiert Stad aus der Helikopterperspektiv mat Pagoden an der Skyline.
Den Text, deen am Clip ze gesinn ass, geet op d’Zerstéierung vu Mandalay an.
© AFP
De Video war och an änleche Bäiträg op Chineesesch, Englesch, Indoneesesch, Spuenesch, Tamil, Thai an Urdu opgedaucht, wéi déi éischt Meldungen iwwer d’Schied an der Stad duerch d’Äerdbiewe vun der Stäerkt 7,7 erauskoumen.
De Chef vun der regéierender Junta, de Min Aung Hlaing, sot den 1. Abrëll, dass bis elo 2.719 Doudeger confirméiert goufen, méi wéi 4.500 Leit goufe blesséiert a 441 géifen nach vermësst ginn (archivéierte Link).
Et gëtt erwaart, dass d’Zuel vun den Doudegen nach erhieflech klamme wäert, wann d’Rettungsekippen d’Stied an d’Dierfer erreechen, an deenen d’Kommunikatioun duerch d’Biewen ënnerbrach gouf.
Honnerte Kilometer méi wäit ewech hunn d’Autoritéiten zu Bangkok bekannt ginn, dass d’Zuel vun den Doudesaffer op 20 geklommen ass. Déi meescht vun hinne koumen ëm d’Liewen, wéi en Héichhaus mat 30 Etagen an de Koup gefall ass, dat zu dësem Zäitpunkt an der thailännescher Haaptstad am Bau war.
D’Kommentarer zu de Bäiträg weisen, dass verschidde Social-Media-Notzer gegleeft hunn, de Video géif reell Biller nom Biewe weisen. “O, Mandalay, mäin Häerz ass gebrach”, huet ee geschriwwen. En aneren huet kommentéiert: “An der ganzer Stad ass bal näischt méi iwwereg.”
“Mat Wan AI hiergestallt”
Eng ëmgekéiert Billersich op Google, fir déi d’Keyframes vum Video benotzt goufen, huet e bal identesche Video op der Plattform X vum 29. Mäerz fonnt. Obwuel d’Bildënnerschrëft net direkt dorop hiweist, dass de Clip mat KI erstallt gouf, ass de Logo vum Generéierungstool “Wan AI” am ënneschte rietsen Eck vum qualitativ héichwäertege Clip ze gesinn (archivéierte Link).
© AFP
Och visuell Feeler deiten Experten no dorop hin, dass de Video mat engem KI-Tool erstallt gouf.
De Shu Hu, Direkter vum Labo fir maschinellt Léieren a Medieforensik op der Purdue University, huet géintiwwer der AFP erkläert, dass d’Beem am Clip keng siichtbar Wuerzelen hunn, wärend eng Persoun op eng Manéier geet, déi net der natierlecher mënschlecher Beweegung entsprécht (archivéierte Link).
De Siwei Lyu, Direkter vum Media Forensic Lab op der University am amerikanesche Buffalo, huet an enger separater Konversatioun mat der AFP op d’KI-Waasserzeeche vu “Wan AI” higewisen an huet ausserdeem dorop higewisen, dass d’Schiet vun Objeten am Clip, wat d’Richtung an d’Gréisst ugeet, net eenheetlech sinn (archivéierte Link).
© AFP
Et gëtt zwar keng idiotesécher Method, fir KI-generéiert Medien ze erkennen, awer d’Erkenne vu Waasserzeechen a visuelle Feeler kann hëllefen, well trotz der rasanter Entwécklung an der generativer KI ëmmer nach Feeler optrieden.
D’AFP huet nach aner Feelinformatiounen am Zesummenhang mam Äerdbiewen a Myanmar opgedeckt.
Dëse Faktencheck gouf vun RTL op Lëtzebuergesch iwwersat.
