Illegal Awanderung ass e wichtege Sujet vun de Republikaner am US-Presidentschafstswalkampf.
No der Debatt mat der Kamala Harris huet dem Trump seng Walekipp d’Rumeuren, dass haitianesch Migranten an der Stad Springfield am US-Bundesstaat Ohiio d’Hausdéiere vu Mënsche klauen an iesse géifen, an de Sozialen Netzwierker gepusht. D’Autoritéite vum genannte Bundesstaat hunn der AFP matgedeelt, dass si keng Meldunge vun där Aart kritt hunn. Ausserdeem géif kee vun den angeeblechen Online-Beweiser dës Behaaptunge stäipen.
“Viru Méint hunn ech de Problem vun illegalen haitianeschen Awanderer ugeschwat, déi Sozialleeschtungen kréien an zu Springfield, Ohio fir grousse Chaos suergen”, sot de republikanesche Vizepresidentschaftskandidat J.D. an engem Bäitrag vum 9. September 2024 op der Plattform X.
“Berichter weisen elo, dass Mënschen hir Hausdéiere geklaut kruten an déi gefriess goufe vu Leit, déi net an dësem Land sollte sinn. Wou ass eise Grenzzar?”
© AFP
Den Trump huet sech an enger Rei vu Bäiträg op senger Plattform “Truth Social” op d’Virwërf bezunn an huet versicht, seng Haltung zu Migratiounsfroe mat der Ënnerstëtzung vun der demokratescher Presidentschaftskandidatin Kamala Harris fir en humanitäre Sursis fir haitianesch Migranten am Virfeld vun der éischter a méiglecherweis eenzeger am Fernsee iwwerdroener Debatt vun de Kandidate fir d’Wäisst Haus ze vergläichen.
Aner konservativ Deputéiert, Fonctionnairen an Influencer, souwéi Fox News an den Elon Musk, sinn op den Zuch iwwer d’Rumeure vun haitianesche Migranten opgesprongen, fir den Trump ze ënnerstëtzen.
“Schützt eis Inten a Kazen an Ohio!” hu Republikaner aus der Justizkommissioun vum US-Representantenhaus den 9. September op X gepost an hunn dobäi e beaarbecht Bild vum eemolege President, deen eng wäiss Int an eng gesträift Kaz rett, gedeelt.
© AFP
D’Behaaptungen, déi sech iwwer X, Facebook, Instagram, Threads and TikTok verbreet hunn, schénge vun engem Bäitrag an enger Facebook-Grupp mam Numm “Springfield Ohio Crime & Information” ze stamen (hei archivéiert).
“Warnung un jidderee wéinst eise geléiften Hausdéieren & deejéinege ronderëm eis!!”, heescht et an engem Screenshot, deen am Internet ënnerwee ass.
“Meng Nopesch sot mir, dass hir Frëndin hir Kaz verluer huet. Si huet Säiten, Zwingeren iwwerpréift, huet ronderëm gefrot asw. Enges Daags koum si vun der Aarbecht heem, wéi si aus dem Auto geklomme war, huet si op en Nopeschhaus gekuckt, wou Haitianer wunnen, an huet hir Kaz un engem Aascht hänke gesinn, wéi wann e Réi fir d’Schluechte preparéiert gëtt, a si hate se opgeschnidden, fir ze iessen.”
Ënner Beruffung op d’Säit “Rangers & Police” füügt de Post bäi, dass “si et mat Hënn maache” souwéi mat “Inten a Gänsen” an engem lokale Park.
© AFP
Op alle Fall huet d’Police vu Springfield (SPD) der AFP matgedeelt, dass d’Virwërf onbegrënnt wären.
“Als Reaktioun op déi jéngst Gerüchter iwwer kriminell Aktivitéite vun Awanderer an eiser Stad wëlle mir gär kloerstellen, dass et keng glafwierdeg Berichter oder konkreet Meldunge gëtt, dass Hausdéiere vun Eenzelpersoune vun enger Awanderergemeinschaft blesséiert oder mësshandelt ginn”, sot d’SPD den 9. September an engem Statement.
D’AFP huet sech mam Büro vum Sheriff vu Clark County a Verbindung gesat, krut awer keng Äntwert.
“Keng iwwerpréifbar Fäll”
D’Rumeure stäipe sech op eng Mëschung aus ënnerschiddleche Kriminalitéitsrapporten, aus dem Zesummenhang gerappt Biller an onbegrënnt Uschëllegungen aus stättesche Versammlungen.
Stéchwierdersichen deiten dorop hin, dass vill Bäiträg, dorënner och e puer op Spuenesch, op e Virfall am August uspillen, bei deem eng Fra vu Canton, Ohio, ongeféier 225 Kilometer nordëstlech vu Springfield, verhaft gouf, well si angeeblech eng Kaz ëmbruecht a giess hätt (hei archivéiert). Staatlech Opzeechnunge weisen, dass d’verdächteg Persoun Allexis Telia Ferrell heescht an eng registréiert Wielerin a soumat eng US-Biergerin ass.
“Eise Virfall huet eisem Wëssen no näischt mat der Springfield-Geschicht ze dinn”, sot den Dennis Garren, Pressebeoptraagte vum Canton Police Departement, an enger E-Mail vum 10. September. “Souwäit mir wëssen, ass d’Ferrell US-Biergerin. Si gouf 2011 eng éischt Kéier an eiser Stad verhaft.”
Och d’Bild vun engem Mann, deen anscheinend eng Gäns dréit, huet näischt mat Springfield ze dinn. Eng ëmgekéiert Billersich weist, dass d’Foto iwwer d’Stad Columbus zënter op d’mannst dem 28. Juli am Reddit-Threads zirkuléiert – Columbus läit méi wéi 64 Kilometer wäit ewech vu Springfield (hei archivéiert). D’AFP huet d’Bild an enger Noperschaft am nërdlechen Deel vun der Haaptstad vum Bundesstaat Ohio geolokaliséiert (hei an hei archivéiert).
© AFP
Aner Social-Media-Posts weisen e Video vun engem Mann, dee bei der Sëtzung vun der Springfield City Commission de 27. August schwätzt (hei archivéiert).
“Dës Haitianer rennen an Dreckseemeren, se rennen a Gebaier, se rennen an … si kippen Autoen an d’Mëtt vun der Strooss”, sot hien. “Ech weess net, wéi Dir Iech domat wuelfille kënnt.”
Hie seet weider: “Si sinn am Park, paken Inten um Hals, schneiden hinnen de Kapp of an huele se mat an iesse se.”
© AFP
Allerdéngs, sou d’SPD géigeniwwer der AFP, hätt et “keng iwwerpréifbar Fäll vun Awanderer ginn, déi illegal Aktivitéite wéi Besetzung oder Verknaschtung virun Haiser vu Bewunner begaangen hunn.”
“Ausserdeem gëtt et keng Rapporten doriwwer, dass Membere vun der Awanderercommunautéit express de Verkéier stéieren”, sot d’Police nach zousätzlech.
“Verdacht oder oppe Feindseelegkeet”
Geschat 15.000 bis 20.000 haitianesch Migrante sinn an de leschte fënnef Joer aus dem karibesche Land voller Krise geflücht an hu sech zu Springfield néiergelooss, enger Stad mat ongeféier 58.000 Awunner, wéi lokal Norichtenagencë mellen (hei archivéiert).
D’Extensioun vum temporäre Schutzstatus duerch d’Biden-Regierung fir iwwer 100.000 haitianesch Migranten huet et de Mënschen um Territoire vu Springfield erméiglecht, bis Februar 2026 ze bleiwen (hei an hei archivéiert).
© AFP
“Well Migranten a groussen Zuelen a Communautéiten ukommen, déi bal näischt iwwer dës Awanderergruppe wëssen an iwwer den Tempo vum Wandel bestierzt kéinte sinn, kann et zu Spannunge bei den ënnerschiddleche kulturelle Praktiken a Bräich kommen”, huet d’Michelle Mittelstadt, Kommunikatiounsdirektesch vum Migration Policy Institute, den 9. September an enger E-Mail erkläert (hei archivéiert).
“An dësem Ëmfeld gëtt et vill Rumeuren a Leit, déi grad ukomm sinn, kënne mat Mësstrauen oder oppener Feindséilegkeet konfrontéiert ginn.”
Si huet op Shelbyville, Tennessee verwisen, wou en Zoustroum vu somalesche Flüchtlingen, déi vun enger lokaler Héngerveraarbechtungsanlag engagéiert goufen, Rumeuren iwwer Krankheeten am Virfeld vun de Presidentschaftswalen 2008 verbreet goufen (hei an hei archivéiert).
D’AFP huet weider Feelinformatiounen iwwer d’amerikanesch Presidentschaftswalen 2024 iwwerpréift.
Dësen AFP-Artikel gouf vun RTL op Lëtzebuergesch iwwersat.
