Dausende Leit maachen all Joer eng Demande op Asyl an Holland. Feelen an de reguläre Flüchtlingsheemer d’Capacitéiten, da ginn Asyldemandeure munchmol fir kuerz Zäit a fréieren Hoteller ënnerbruecht. Am Januar 2025 war a Sozialen Netzwierker e beaarbechte Screenshot vun engem angeeblechen Zeitungsartikel am Ëmlaf, an deem behaapt gouf, d’prestigeträchtegt Kuerhaus am hollännesche Scheveningen géif sech op d’Ënnerbrénge vu “1500 Asyldemandeure” virbereeden.
Den Angabe vun den Autoritéiten no ginn an dësem Hotel awer keng Demandeur-d’asillen ënnerbruecht. De Screenshot vum Artikel gouf beaarbecht an den Titel geännert.
“Wëlls du och eng Nuecht am Kuerhaus zu Den Haag verbréngen? Da muss du einfach Asyl an Holland ufroen!”, hat en Notzer den 11. Januar 2025 an engem X-Bäitrag op Hollännesch geschriwwen. Dëse gouf méi wéi 500 Mol gedeelt. Am Bäitrag selwer war e Screenshot vun engem Zeitungsartikel dran, mat der Iwwerschrëft “Wee fräi fir d’Arrivée vu 1500 Demandeur-d’asillen, Grand Hotel Amrâth Kurhaus. Autorisatioun accordéiert.”
De selwechte Screenshot war och op Facebook opgedaucht.
Den Angabe vun der Gemeng Den Haag an der Zentralagence fir Asyldemandeuren (COA) no – d’staatlech Agence, déi fir den Hebergement vun Asyldemandeuren zoustänneg ass – wäert de berüümte Fënnef-Stären-Hotel awer keng Demandeur-d’asillen ophuelen. De Screenshot vum Artikel gouf gefälscht.
© AFP
Beaarbechte Screenshot
Fir den Originalartikel aus dem Screenshot erëmzefannen, huet d’AFP am Internet no der Iwwerschrëft vum Artikel, déi am Post benotzt gouf, gesicht. Et goufe keng Hiweiser op en Artikel mat genee dëser Iwwerschrëft fonnt. Eent vun den éischte Resultater op Google war en Artikel mat engem bal identeschen Titel: “Wee fräi fir d’Arrivée vun Demandeur-d’asillen zu Albergen. Autorisatioun accordéiert.”
Den Artikel gouf am Januar 2024 op der Internetsäit vun der hollännescher Regionalzeitung “De Twentsche Courant Tubantia” verëffentlecht (hei archivéiert). Dora gëtt d’Kuerhaus net ernimmt, mee beschriwwen, wéi en alen Hotel zu Albergen – engem Duerf an der hollännescher Provënz Overijssel – fir d’Ënnerbrénge vun 150 Asyldemandeure virbereet gouf.
© AFP
De Layout vum gedeelte Screenshot imitéiert de Layout an de Stil vun der Zeitung, an den Hiweis op Albergen gouf duerch d’Ernimmung vu 1500 Asyldemandeuren am am Kuerhaus ersat. Et gëtt och e puer Onreegelméissegkeete bei den Zeechen an der Rechtschreiwung an der gefälschter Schlagzeil.
Am gefälschte Screenshot goufe souwuel d’Foto wéi och d’Bildënnerschrëft och verännert. Just den Numm vum Journalist Hans Brok, deen den Text verfaasst an d’Foto am ursprénglechen Artikel geschoss hat, gouf bäibehalen. Och d’Foto vum Kuerhaus soll de Brok gemaach hunn. Eng ëmgekéiert Billersich nom Bild ergouf awer, dass d’Foto vum Hotel selwer gemaach gi war.
Genee dat selwecht Bild gouf op der Internetsäit vum Hotel verëffentlecht (hei archivéiert). Dat komplett Bild ass hei ze gesinn. Et sinn déi selwecht Leit a Sonneprabbelien op der Plage ze erkennen, déi selwecht Wolleken, an d’Fändelen um Daach vum Hotel weisen an déi selwecht Richtung. D’selwecht Foto gëtt och op verschiddene Buchungsportaler benotzt, fir fir den Hotel Reklamm ze maachen. Néierens ginn de Brok oder d’Zeitung “De Twentsche Courant Tubantia” als Quell dofir ernimmt.
Bei enger weiderer Sich mat de Stéchwierder “Kuerhaus” an “Asyldemandeuren” konnt d’AFP en Artikel vun der Zeitung “Algemeen Dagblad” vum Abrëll 2023 fannen. An dësem gëtt eng Lokalpolitikerin vun der liberal-konservativer Vollekspartei fir Fräiheet an Demokratie (VVD) an enger Debatt iwwer d’Ophuele vun Asyldemandeuren duerch hollännesch Stied mat de Wierder zitéiert: “Wat ass den nächste Schratt? D’Kuerhaus?” (hei archivéiert)
Mat dëser sarkastescher Bemierkung sollt den Hebergement vu weideren Demandeur-d’asillen zu Den Haag kritiséiert ginn. Mee néierens an der Debatt gouf d’Ënnerbrénge vun Asyldemandeuren am Kuerhaus tatsächlech ernimmt.
Autoritéite confirméieren: Keng Asyldemandeuren am Kuerhaus
All Flüchtlingsheemer a regulär Hebergementer vun der Zentralagence fir Asyldemandeuren (COA) kënnen iwwer den Tool “Location Finder” op hirer Internetsäit fonnt ginn. Dem Tool no gëtt et just ee Flüchtlingsheem am Den Haager Staddeel Scheveningen, am Gevers Deynootweg. Do gouf en aalt Wunnheem renovéiert, fir vun Ufank 2025 bis 2028 bis zu 50 onbegleet Mannerjäreger ënnerzebréngen.
D’Nathalie Nuiten, eng Spriecherin vun der COA a Südholland, sot de 27. Februar 2025 géintiwwer der AFP, dass den Artikel iwwer d’Kuerhaus “ganz offensichtlech gefälscht” wär.
Den Donnéeë vum Zentralamt fir Statistik (CBS) no koumen am Joer 2024 insgesamt 44.055 Asyldemandeuren an hir Familljen an Holland un (hei archivéiert). No hirer Arrivée kënne se a verschiddenen Typpe vu Logementer ënnerbruecht ginn, wéi zum Beispill an enger regulärer Ënnerkonft an engem Asylbewerberzenter oder an engem Hebergement urgent – falls d’Capacitéiten an der regulärer Ënnerkonft feelen.
Hoteller ginn heiansdo als Hebergement urgent genotzt a méi al Hoteller goufen an der Vergaangenheet a regulär Flüchtlingsheemer ëmgebaut, huet d’Nuiten erkläert. Am Grand Hotel Amrâth Kuerhaus war dat awer net de Fall.
Eng Spriecherin vun der Gemeng Den Haag huet der AFP an enger E-Mail vum 5. Mäerz 2025 matgedeelt, dass et “keng Pläng fir en Ënnerbréngen am Kuerhaus” géif. “Dat ass eng Fakenews”, huet si bäigefüügt.
D’AFP huet de Kuerhaus-Hotel fir e Kommentar kontaktéiert, krut awer bis zum Moment vun der Publikatioun keng Äntwert.
Fazit: Am Grand Hotel Amrâth Kuerhaus am hollännesche Scheveningen goufen a gi keng Asyldemandeuren ënnerbruecht. De Screenshot, deen an de Sozialen Netzwierker ëmhier geet an an deem dat behaapt gëtt, gouf beaarbecht an ass eng Falschinformatioun.
Dëse Faktencheck gouf vun RTL op Lëtzebuergesch iwwersat.
