A sozialen Netzwierker an Nigeria an Ethiopien ass ze liesen, dass Biller den Tech-Mogul Elon Musk mat senger “Roboterfra” bei engem kommerzielle Release am September 2023 weisen. Déi Fotoe sinn natierlech gefälscht.
© AFP
De Bäitrag, dee méi wéi 13.000 Mol gedeelt gouf, enthält Fotoe vum Musk, op deenen hie verschidde “Roboterfrae” kësst oder mat hinnen danzt.
Si hu mënschenänlech Gesiichter, awer hir Kierper schéngen eng Mëschung aus Metall an anere mënschenänleche Mierkmoler ze sinn.
Den Notzer behaapt och, dass dem Musk seng “Roboterfrae” mat Batterie lafen an och “e Menstruatiounszyklus” hunn. D’Käschte belafe sech op ongeféier 3.000 $ an de Roboter ass mat engem Passwuert oder duerch e Fangerofdrock geschützt.
“Dat ass d’Entvëlkerungsstrategie. Hitt Iech virun der neier Weltuerdnung, bleift staark. Dat sinn d’Zeeche vun der Endzäit”, steet an engem Kommentar ënner dem Bäitrag.
Aner Kommentarer kléngen däitlech méi fraefeindlech.
“Endlech huet Gott e Plang fir eis Jongen! Ech wëll en daaft Exemplar”, steet an engem anere Kommentar.
Änlech Bäiträg goufen op anerer Plaz op Facebook an Twitter gedeelt.
Awer d’Behaaptung, de Musk a seng Firma géifen un enger “Roboterfra” schaffen, ass falsch.
Mat KI generéiert
Mat der Hëllef vun enger ëmgekéierter Billersich huet den AFP-Faktencheck erausfonnt, dass d’Biller ursprénglech vun engem Facebook-Notzer mam Numm “Guerrero Art” gedeelt goufen (hei archivéiert), an dat den 3. Mee 2023 op enger Säit mam Numm “AI Art Universe“.
D’Säit beschreift sech selwer als Uert fir “déijéineg, déi eng Passioun fir den Asaz vu KI an hirer Aarbecht deelen”.
© AFP
KI steet fir kënschtlech Intelligenz, déi genotzt ka ginn, fir realistesch Biller ze produzéieren.
E puer realistesch Biller vun erwänenswäerten Noriichte goufe scho mat echte verwiesselt an op sozialen Netzwierker gedeelt, dorënner KI-generéiert Biller vun der Verhaftung vum eemolegen US-President Donald Trump an dem Poopst an enger stylescher Kaputzejackett.
Op der perséinlecher Säit vu Guerrero Art bezeechne si sech selwer als “digital Kreateuren” a publizéiere reegelméisseg KI-generéiert Biller, dorënner e puer vum 21. Mee 2023, déi de Musk mat engem Roboter an engem Stil an engem Auto, dee flitt, weisen.
De Bäitrag mam fléienden Auto enthält den Numm vum Instagram-Account vu Guerrero Art (hei archivéiert).
© AFP
E puer vun de selwechte Roboterfotoe dauchen op Instagram mat den Hashtags #ai, #aiartwork an #aicommunity op.
An engem Kommentar ënner dem Instagram-Post freet een Notzer, mat wéi engem Tool d’Biller erstallt goufen, wourop Guerrero Art mat “MidJourney” äntwert.
MidJourney ass e KI-Tool, dee Biller baséierend op Textopfuerderunge generéiert, déi vun den Notzer agi ginn. Dëse YouTube-Video erkläert, wéi dat funktionéiert.
© AFP
An hirem originale Facebook-Post hu Guerrero Art déi spezifesch Uweisungen opgelëscht, déi si fir d’Erstelle vun de Biller benotzt hunn, zesumme mat der Iwwerschrëft “de wierkleche Grond, firwat den Elon Musk KI reguléiere wëll”.
© AFP
Doriwwer eraus kann ee beim Eruzoomen un d’Bild Inkonsistenzen an Defekter feststellen, déi typesch fir kënschtlech generéiert Biller sinn.
Sou si beispillsweis d’Fangere vun der rietser Hand vun der “Roboterfra” verzerrt, de Rankfanger schéngt uewe gespléckt ze sinn.
© AFP
Hei gitt Dir méi doriwwer gewuer, wéi Dir KI-generéiert Biller erkenne kënnt.
Tesla-Bot
De Musk besëtzt d’Technologiefirma Tesla, déi – hirer Internetsäit no – un engem humanoide Roboter schafft (hei archivéiert), “dee capabel ass, onsécher, repetitiv oder langweileg Aufgaben” ze iwwerhuelen.
D’Technologiefirma huet de 16. Mee 2023 bekannt ginn, dass den “Tesla-Bot” elo lues lafen an Objeten ophiewe kann.
Awer et gëtt op hirer Internetsäit näischt iwwer d’Schafe vun enger “Roboterfra” gesot an d’Roboter, déi an de Reklamme vun Tesla ze gesi sinn, hu keng mënschlech Gesiichtszich.
Dësen AFP-Faktencheck gouf vun RTL op Lëtzebuergesch iwwersat.
