Déi vum Mënsch ausgeléist Klimaerwiermung huet der Meenung vun Experten no schonn zu visibele Verännerunge gefouert.
Trotzdeem hunn Internetnotzer Biller vu Rio de Janeiro a verschiddene Joerhonnerte verbreet, déi beweise sollen, dass de Mieresspigel zënter 1880 net geklommen ass. Deem ass awer net esou.
Dräi Biller loosse keng wëssenschaftlech Konklusiounen zou, an de globale Mieresspigel ass opgrond vun de jéngste Klimaverännerunge staark geklommen, wéi Miessunge ronderëm de ganze Planéit weisen an eng Rei Experten der AFP matgedeelt hunn.
Duerstellunge mat dräi Biller vun enger Landzong am Mier, verbonne mat dräi verschiddenen Datumer: “ca. 1880”, “ca. 1910” an “2020”. Op den dräi Fotoe schéngen déi eenzeg Ënnerscheeder déi nei Gebaier ze sinn, wärend de Mieresspigel relativ änlech bleift.
“De Mieresspigel klëmmt wéinst der globaler Erwiermung an all deem weider” steet ironesch a Bäiträg op Facebook an X, déi a Frankräich an a Québec gedeelt goufen. De Saz ass mat Ausruffzeechen, Emojien, déi d’Zong erausstrecken oder e Clownekapp duerstellen, versinn, déi d’Realitéit vun der Hausse vum Waasser a Fro stelle sollen.
Änlech Publikatioune goufen op Däitsch, Englesch, Ungaresch, Schweedesch, Bulgaresch an Hollännesch an de Sozialen Netzwierker verbreet.
© AFP
© AFP
Dës Messagë sinn Deel vun enger Rei vun ierféierende Publikatiounen, déi déi beschleunegt Hausse vum Mieresspigel opgrond vun der Äerderwiermung, déi duerch de Mënsch ausgeléist gëtt, a Fro stellen, obwuel dëst vu Wëssenschaftler nogewise gouf.
Zwar schwankt de Mieresspigel zënter Honnerte vu Millioune vu Joren iwwer grouss Zäitspanen, mee déi (zimmlech séier) Hausse, déi zënter dem leschte Joerhonnert agesat huet, gëtt vu Wëssenschaftler eendeiteg op mënschlech Aktivitéiten zeréckgeféiert, wéi d’AFP op dëser Fiche schonn e puermol detailléiert beschriwwen huet. Doriwwer eraus huet dat séiert Klamme vum Mieresspigel grav Konsequenze fir déi concernéiert Bevëlkerung.
D’Bucht vu Guanabara
D’Biller, déi an de Publikatioune gewise ginn, hu keng Bildbeschreiwung, ofgesi vun de genannten Datumer, an et gi keng Donnéeën iwwer d’Quelle gemaach.
Eng erweidert Google-Sich a Kombinatioun mat enger ëmgekéierter Billersich unhand vu Fotoen erlaabt et erauszefannen, dass si den Zockerhuttbierg weisen, ee vun den Emblemer vun der brasilianescher Stad Rio de Janeiro.
Säin Numm (Pão de Açúcar op Portugisesch) kënnt vu senger ikonescher Form, déi un en Zockerhutt erënnert. Den 394 Meter héiche Fiels ass op der Hallefinsel Urca an der Bucht vu Guanabara a gehéiert zu Rio de Janeiro. Eng Seelbunn fiert op d’Spëtzt vum Bierg an ass en immens beléift Ausfluchzil zu Rio de Janeiro.
Duerch eng ëmgekéiert Billersich fir all déi dräi Fotoe war et méiglech, a fräi zougängleche Billerdatebanken oder Artikelen am Internet weider Fotoe vun der selwechter Plaz mat Gebaier vun änlecher Bauhéicht ze fannen, déi relativ no un den Datumer leien, déi an de Publikatiounen an de Sozialen Netzwierker ernimmt ginn: circa 1880 fir dat éischt Bild, circa 1910 fir dat zweet an circa 2010 fir dat drëtt (an de Publikatioune gëtt vun 2020 geschwat).
© AFP
Aus dem Kontext gerappt Biller si keng wëssenschaftlech Beweiser
Mee dräi Fotoe vu bestëmmte Momenter aus dräi Joerhonnerte loosse keng Réckschlëss op Verännerunge vum Mieresspigel zou, sot de Physiker Torsten Albrecht (Link hei archivéiert), deen um Potsdam-Institut für Klimaforschung d’Hausse vum Mieresspigel an d’Verännerunge vu Gletscheren ënnersicht (Link hei archivéiert), de 6. Juni 2024 der AFP.
“Dës Fotoen, déi vu Wäitem opgeholl goufen, kënne sécherlech keng Ënnerscheeder am Zentimetermoossstaf opweisen“, huet hien erkläert.
Hien huet och betount, dass et sech bei dëse Biller ëm “Momentopnamen an net ëm Duerchschnëttswäerter” handelt. Se sollten als sollch analyséiert ginn an net zu Réckschlëss op laangfristeg Klimaverännerunge féieren, déi en plus verzerrt kéinte sinn, well “lokal Tendenze méiglecherweis net representativ fir allgemeng Tendenze sinn”.
De Mieresspigel un de Küste kann op Fotoen, déi zu bestëmmte Momenter opgeholl goufen, jee no Wiederlag, Ebbe oder Flut, komplett ënnerschiddlech ausgesinn, ouni Réckschlëss op déi allgemeng Entwécklung vum Mieresspigel ze ginn.
Parallellen tëscht kuerzfristegen, punktuelle Wiederphenomeener a laangfristegen Tendenzen an Duerchschnëttswäerter, déi fir Klimaetüde genotzt ginn, ze zéien, gëtt dacks duerchernee geheit. Dat gëtt heiansdo bewosst a Rieden, déi dorop ofzilen, d’Existenz vun der Klimaverännerung oder hiren Ursprong a Fro ze stellen, benotzt – d’AFP huet dat op dëser Fiche detailléiert zesummegefaasst.
Den Ingo Sasgen, Fuerscher am Departement fir Glaziologie vum Alfred-Wegener-Institut (AWI) a Spriecher vu Wëssenschaftler, déi fir d’Fuerschungsgrupp vun Helmholtz REKLIM zu Mieresspigelverännerunge geschafft hunn (archivéierte Link), huet der AFP de 7. Juni 2024 confirméiert, dass d’Fotoe keng wëssenschaftlech Konklusiounen iwwer de Mieresspigel zouloossen.
“D’Fotoen, déi vu Wäitem geschoss goufen, sinn hei keng gutt Method. D’Hausse vum Mieresspigel läit iwwer Joerhonnerten gekuckt bei ongeféier engem Zentimeter”, wat op Biller vun engem Bierg, dee knapp 400 Meter héich ass, schwéier ze gesinn ass.
“Déi bescht Miessunge vu relative Variatioune vum Mieresspigel, dat heescht d’Miessunge vun der Variatioun géintiwwer der Küst, gi vu Gezeitenstatiounen duerchgeféiert“, sot hie weider.
Dës Statioune sinn op der ganzer Äerd verdeelt an erméigleche Miessunge vum Mieresspigel, déi uschléissend vu Fuerscher analyséiert an der Ëffentlechkeet zougänglech gemaach ginn.
An zënter 1963 befënnt sech esou eng maregraphesch Statioun an der Géigend vum Zockerhuttbierg bei Ilha Fiscal an der Bucht vu Guanabara. De permanenten Déngscht fir den duerchschnëttleche Mieresspigel (PSMSL) vum britteschen National Oceanographic Centre (NOC) analyséiert d’Donnéeën, déi do gemooss ginn.
Dësen Donnéeën no ass de relative Mieresspigel virun der Küst vu Rio de Janeiro ëm duerchschnëttlech 2,35 Millimeter pro Joer geklommen, wat schonn enger Hausse vu méi wéi 14 Zentimeter zënter dem Ufank vun den Miessungen am Joer 1965 entsprécht.
© AFP
De Mieresspigel klëmmt, awer net gläichméisseg
D’Donnéeën, déi zu Ilha Fiscal gemooss ginn, weisen däitlech, dass de Mieresspigel virun der Küst vu Rio de Janeiro an de leschte Joerzéngte geklommen ass.
D’Experten, déi vun der AFP befrot goufen, weisen awer dorop hin, dass d’Donnéeë vun enger Miessstatioun net duerginn, fir verlässlech Réckschlëss op déi weltwäit Verännerunge vum Mieresspigel ze zéien.
“De gréisste Deel vun der globaler Hausse vum Mieresspigel ass aktuell op d’Schmëlze vum Äis a Grönland, der Antarktis an de Gletscher weltwäit zeréckzeféieren”, huet den Torsten Albrecht ënner Referenz op aktuell Fuerschungsresultater erkläert (archivéierte Link).
Mat der Hausse vun der duerchschnëttlecher Uewerflächentemperatur opgrond vun der globaler Erwiermung klëmmt de Mieresspigel, wat op zwee Phenomeener zeréckzeféieren ass: Dat méi waarmt Mierwaasser deent sech aus, an d’Schmëlze vu Gletscher a Polkappen erhéicht den Apport vu Séisswaasser an d’Mierer, wouduerch d’Séisswaasserreserve vun der Äerd ofhuelen.
Den Ingo Sasgen betount awer, dass d’Hausse vum Waasser weltwäit net gläichméisseg ass, well regional Facteure wéi Verännerunge vum Waasserkreeslaf, vum Wand, vun de Mieresstréimungen oder vum Loftdrock souwéi tektonesch Beweegungen, déi d’Landmass hiewen oder ofsenken, zu groussen Ënnerscheeder bei der Miessung a Stied, déi un der Küst leien, féiere kënnen.
Och d’Schwéierkraaft géing eng Roll spillen, sou de Fuerscher. “Wann d’Mass vun de Äiskappen ofhëlt, wäert regional manner Waasser dohi gezunn. Dat bedeit, dass de Mieresspigel an der entgéintgesater Regioun vun der Welt besonnesch klëmmt.”
Fir wëssenschaftlech Konklusiounen iwwer de globalen duerchschnëttleche Mieresspigel ze zéien, mussen dohier weltwäit méiglechst vill Miessstatiounen zur Verfügung stoen, deenen hir Donnéeën duerch aner Facteure korrigéiert ginn, déi de Mieresspigel lokal beaflosse kënnen.
Donnéeën no (archivéierte Link), déi weltwäit vun der US-Loftfaartfuerschungsagence NASA gesammelt an analyséiert goufen, “ass de globale mëttlere Mieresspigel (GMSL) zënter 1880 ëm ongeféier 22 Zentimeter geklommen. Dat soen eis weltwäit Miessunge ronderëm Küsten”, huet den Torsten Albrecht bäigefüügt.
An d’Hausse vum Mieresspigel huet sech virun allem an de leschte Joerzéngten däitlech beschleunegt.
“Haut erméigleche Satellitten an autonom dreiwend Bojen en zimmlech geneet Bestëmme vum globalen duerchschnëttleche Mieresspigel an deem säin Opschlësselen an eenzel Wäerter. Am Zäitraum vu Januar 1993 bis Dezember 2016 ass de globalen duerchschnëttleche Mieresspigel an der Moyenne ëm 3,05 ± 0,24 Millimeter pro Joer geklommen”, sou den Ingo Sasgen.
© AFP
A sengem Rapport vun 2021 schreift den Tëschestaatleche Kommitee fir Klimaverännerunge (IPCC) vun de Vereenten Natiounen, deem seng Aarbecht als Referenz gëllt, dass “de mënschlechen Afloss” zënter op d’mannst 1971 “extreem warscheinlech” d’Haaptursaach fir d’Hausse vum Mieresspigel weltwäit ass.
L’aménagement des côtes
De Luiz Paulo de Freitas Assad, Ozeanolog a Professer op der Staatsuniversitéit vu Rio de Janeiro, sot der AFP den 10. Juni 2024, dass d’Konsequenze vum Klimawandel a Brasilien an de leschte Joren immens siichtbar gewiescht wären.
“Net just un der Küst vu Rio de Janeiro, mee och an anere Küsteregioune vu Brasilien hu mir schonn Erosioun observéiert, déi duerch d’Hausse vum Mieresspigel an déi ëmmer méi heefeg a méi intensiv Wiederphenomeener verursaacht gëtt”, huet hien erkläert.
De Fuerscher weist och op den Afloss vu mënschlechen Agrëffer op den Amenagement vun de Küsten hin. Wann d’Küst vum Zockerhuttbierg op de Fotoen, déi tëscht 1880 an 2020 gemaach goufen, anescht ass, ass dat senger Meenung no och dowéinst, well d’Bucht vu Guanabara duerch Bebauungen an Infrastrukturprojete verännert gouf.
“D’Urbaniséierungsprozesser an de Küsteregioune sinn op ville Plazen ouni kloer Organisatioun entwéckelt ginn. Mangrovenbëscher goufen zerstéiert, wat d’Widderstandsfäegkeet vun dëse Gebidder par rapport zu de Konsequenzen vum Klimawandel – zum Beispill d’Hausse vum Mieresspigel – erhieflech schwächt”, huet hie bäigefüügt.
© AFP
D’AFP huet schonn an der Vergaangenheet falsch oder ierféierend Behaaptungen iwwer d’Hausse vum Mieresspigel opgrond vum Klimawandel widderluecht, wéi hei, wou Publikatioune behaapt hunn, dass Fotoe vun der Fräiheetsstatu, déi méi wéi ee Joerhonnert zeréckleien, d’Hausse vum Mieresspigel duerch déi global Erwiermung a Fro stelle kéinten. An anere Publikatioune gouf de mënschlechen Afloss op d’Hausse vum Mieresspigel a Fro gestallt oder et goufen Donnéeë falsch benotzt an interpretéiert.
Dësen AFP-Artikel gouf vun RTL op Lëtzebuergesch iwwersat.
