© RTL Grafik
Egal ob an engem Kraider-Téi, an enger Anti-Aging-Crème oder a Kapselen: Kurkuma, e Gewierz aus Asien, ass an der Moud. Entreprisen, déi et vermaarten, awer och Internetnotzer ginn an de sozialen Netzwierker mat de ville Fäegkeete vun dësem “Gesondheetsliewensmëttel” un. Kurkuma géif d’Haut méi schéi maachen, awer och Diabetes reguléieren a souguer Kriibs behandele kënnen respektiv virbeugen.
En ass de Star vun de “Wellness-Liewensmëttel”: Kurkuma ass dat Gewierz, dat een doheem am Schaf muss hunn, fir gesond ze sinn, sou heescht et an de sozialen Netzwierker.
Schonn zënter enger Rei Jore luewe Publikatiounen d’Virzich vun dësem iessbare “Gold”, wéi dëse Message aus dem Joer 2018 vun enger Epicerie op Facebook verséchert: “Kurkuma ass exzellent fir d’Verdauung, en huet och d’Fäegkeet, Entzündungen ze reduzéieren, Kriibs virzebeugen an d’Gehier virun Alzheimer ze schützen.”
Experteberichter zum Sujet “Wuelbefannen” oder “natierlech Gesondheet” empfeele seng Virdeeler op TikTok och als “gutt a renatierlech”. De Video zu Kurkuma gouf iwwer 13.000 Mol gekuckt. Eng enregistréiert Stëmm lëscht “d’Virdeeler vu Kurkuma” op, déi hirer Meenung no “de Risiko vun Häerzkrankheete verréngert”, “de Cholesterolspigel senkt”, “kriibshemmend Eegenschaften” huet an “hëlleft, d’Auswierkunge vun der Chimio ze reduzéieren”.
© AFP
E weidere Kont mam Numm “Vitalixir“, dee ganz ënnerschiddlech, awer net bewise gesondheetlech Rotschléi wéi “all Dag Zitrounewaasser drénken” oder “all Dag Léift maache” gëtt, fir d’Gesondheet ze verbesseren, recommandéiert “eng Taass Kurkuma den Dag”, fir “Häerzkrankheeten, Arthritis, all Zorte vu Kriibs ze reduzéieren” an et “kann [och] hëllefen, Diabetes ze kontrolléieren”.
Op TikTok luewen och vill Beauty-Influencer déi heelend an ophellend Wierkunge vu Kurkuma an deele Rezepter fir Hausmasken. D’Schlagwuert #curcuminebenefits (d’Virdeeler vu Kurkuma) hat den 19. Oktober insgesamt zwou Millioune Views am sozialen Netzwierk a #curcumamask 400.000 Views.
© AFP
Déi therapeutesch Aussoen iwwer Kurkuma goufen an diverse Sproochen a Länner verbreet, z.B. op Englesch a Spuenesch.
An de leschte Jore gouf et scho Feelinformatiounen iwwer Kurkuma: D’AFP hat beispillsweis gewisen, dass en net dozou benotzt ka ginn, de Spike-Protein a Covid-Impfstoffer ofzebauen, oder dass e keen effikassen Traitement géint Myokarditis ass.
Interessant entzündungshemmend Eegenschaften
Kurkuma, deen een aus der Kiche wéinst senger gieler, quasi oranger Faarf kennt, och “Safran aus Indien” genannt, ass eng Planz, déi majoritär a Südostasien ugebaut gëtt an zënter Joerhonnerte fir d’Wierze vu Platen, besonnesch déi mat Curry, genotzt gëtt.
Säi Rhizom, säin ënnerierdesche Stamm, gëtt och schonn zënter Urzäite fir medezinesch Zwecker zu Polver verschafft, fir de Wierkstoff Curcumin mat senger entzündungshemmender Wierkung ze extraéieren.
Déi exzellent Reaktivitéit am Laboratoire vu Curcumin huet dëse Moleküll zu engem interessante Fuerschungsobjet gemaach, wéi an dësem Video vu Quechoisir erkläert gëtt (Archiv).
© AFP
Cheemesch gesinn, seet den Dr. Stéphane Korsia-Meffre, Déierendokter an Neurobiolog, op dem Site spécialiste des médicaments Vidal.fr (Archiv), hunn d’Curcumioniden am Kurkuma-Rhizom “ausgepräägt antioxidant an entzündungshemmend Eegenschaften”.
Hien erënnert dorun, dass d’Weltgesondheetsorganisatioun (WHO) d’Benotze vu Kurkuma bei “Verdauungsschwieregkeete mat Iwwersaierung a Flatulenzen” als “klinesch gerechtfäerdegt” unerkennt.
Eng rezent Etüd (Archiv), déi am Joer 2022 am BMJ Evidence-based medicine publizéiert gouf, weist eng änlech Effikassitéit vu Curcumin an Omeprazol (dat de Reflux vum Mo reduzéiert) bei Patiente mat funktioneller Dyspepsie, enger chronescher Erkrankung vum ieweschte Verdauungstrakt.
Wat d’Wierkung vu Curcumin op d’Haut betrëfft, sou ass et “en interessante Wierkstoff, deen an der Absorptioun entzündungshemmend ass, an enger ingestibler Form”, huet d’Marie Jourdan (Archiv), Dermatologin a Venerologin zu Paräis, der AFP den 19. Oktober erkläert.
Gëtt et direkt op d’Haut opgedroen, wéi et vun den Influencer empfuele gëtt? “Mir wëssen, dass et en ophellend Mëttel ass, also wann et Iech vun Ären doudegen Zelle befreit, gesäit et gutt aus”, huet si bäigefüügt. D’Dermatologin freet sech awer, ob Curcumin a bestëmmte Kosmetika enthalen ass: “A priori ass et just an enger grousser Dosis wierksam, dohier kann ee sech d’Fro stellen, ob es an der sougenannter ‘Kurkuma-Crème’ genuch dran ass oder ob et stabil genuch ass, fir eng Wierkung ervirzeruffen.”
Opgrond vun de villverspriechende Wierkunge vu Curcumin sinn d’Etüden zu dësem Gewierz bei anere Krankheeten an de leschte Joren spronghaft geklommen, wéi d’ANSES, déi franséisch Agence nationale de sécurité sanitaire de l’alimentation, de l’environnement et du travail, an engem Rapport aus dem Joer 2022 (Archiv) festgestallt huet. Eng Recherche mam Begrëff Curcumin an der wëssenschaftlecher Datebank Pubmed hat 1990 73 Artikelen als Resultat, sou déi franséisch Agence. Am Oktober 2021 waren et 17.885 Artikelen.
Den Dr. Stéphane Korsia-Meffre kënnt zur Konklusioun: “Et goufe méi wéi 120 klinesch Etüde verëffentlecht, awer keng hat genuch Aussokraaft, fir endgülteg Schlussfolgerungen ze zéien. Trotzdeem feelt et net u wëssenschaftlechen Artikelen, déi heefeg vun Entreprisen, déi Kurkuma vermaarte wëllen, ugereegt ginn.”Fir hien ass “Kurkuma en typescht Beispill fir d’Faiblessë vun Etüden iwwer d’Effikassitéit vu Substanze vun natierlechem Ursprong (d.h. net patentéierbar)”.
Liewerschiedungen a groussem Ëmfang
Problem: Mat all senge “Verspriechen” zitt Kurkuma vill Consommateuren un, déi een oder méi vu hire gesondheetleche Problemer léise wëllen, well si mengen, dass Kurkuma, vue dass et natierlech ass, och ongeféierlech ass.
Am Beräich vun de komplementare Liewensmëttel ass Kurkuma domat zu engem beléifte Produit avancéiert. De Maart vu komplementare Liewensmëttel – Kapselen, Ueleger, Siropen – progresséiert konstant an et ginn, der ANSES no, all Mount méi wéi 1.000 nei Autorisatiounen ugefrot.
Den 20. Oktober huet d’Fanny Huret (Archiv), Chargée de projets scientifiques bei der ANSES a Coordinatrice vum Avis aus dem Joer 2022 iwwer Kurkuma, géintiwwer der AFP erkläert: “Et ass noutwenneg, dass d’Gesondheetsberuffler an d’Consommateuren iwwer d’Presenz vu Wierkstoffer an de komplementare Liewensmëttel informéiert ginn. Soubal e wierkt, interagéiert e mat de lafenden Traitementer, mat de biologesche Systemer…”
An hirem Rapport vun 2022 erënnert d’ANSES dorun, dass “Etüden dorop hindeiten, dass héich Dosisse vu Kurkuma oder Curcumin bei Déieren hepatotoxesch sinn”, a stellt tëscht 2009 an 2021 e bësse manner wéi eng Dose Fäll vun Hepatite fest, déi warscheinlech op d’Consommatioun vu Kurkuma a Frankräich zeréckzeféiere sinn. Insgesamt goufen 120 Niewewierkunge registréiert, déi op Gewierzer zeréckzeféiere waren.
Zënter der Publikatioun vun dësem Avis huet d’Ekipp vun der Fanny Huret 55 nei Signalementer am Zesummenhang mat Kurkuma iwwer d’Nutrivigilance-Plattform (Archiv) erfaasst, déi et jidderengem erméiglecht, Niewewierkungen am Zesummenhang mat Liewensmëttel oder komplementare Liewensmëttel online ze mellen. “Mir stelle virun allem Reaktioune vum Verdauungstrakt fest: Iwwelzegkeet, Duerchfall a souguer Hepatitis”, wéi si sot.
Dës Wierkungen triede bei Doséierungen op, déi wäit iwwer deene leien, déi mat de Moolzechten ageholl ginn. Komplementar Liewensmëttel si sou konzipéiert, dass Curcumin vill méi staark vum Kierper opgeholl gëtt, “véier- bis 185-mol méi wéi net traitéierte Curcumin”, betount d’ANSES.
Och wa se anscheinend déi zoulässeg Dagesdosis (180 mg Curcumin pro Dag fir eng Persoun vu 60 kg) net iwwerschreiden, kënnen dës nei Formelen, déi heefeg Piperin (Peffer) enthalen, de Risiko vun Niewewierkunge steigeren.
© AFP
D’ANSES huet sech och besuergt iwwer d’Heterogenitéit vun de Produiten, déi op dem franséische Maart ze kréie sinn, geäussert, well d’Quantitéit vu Curcuminoiden an dëse Produite “ganz ënnerschiddlech ass a vu 0,075 mg (wässeregen Dréchenextrakt) bis 7,5 g (wässerege Flëssegextrakt) geet”.
An Italien oder der Belsch, sou déi franséisch Agence, hunn d’Autoritéiten no de Liewerschied d’Verwende vu curcuminhaltege komplementare Liewensmëttel ageschränkt a bei Stéierunge vun der Liewer- oder Galefunktioun oder bei Galesteng dovun ofgeroden.
An den USA huet d’FDA (déi US-amerikanesch Medikamentenagence, Archiv) am Joer 2019 nom Doud vun enger Patientin e Verbuet vu Curcumin a medezinesche Präparater gefuerdert. En Heelpraktiker hat hir Curcumin gesprëtzt, fir en Ekzeema ze behandelen.
Wiesselwierkunge mat Anti-Kriibs-Medikamenter a keng nogewisen Effikassitéit géint Kriibs
Iwwer d’Niewewierkungen am Zesummenhang mat der Absorptioun vu Curcumin zielen d’ANSES-Experte Wiesselwierkunge mat Therapien, bei deenen d’Gerënnung vum Blutt gehemmt gëtt, awer och mat Kriibsmedikamenter, déi ë.a. vun enger Ekipp vum Gustave Roussy Institut an enger Etüd aus dem Joer 2018 dokumentéiert goufen (Archiv).
Den Donnéeë vun der belscher Stëftung géint Kriibs (Archiv) no ass et besser, Kurkuma net a Kombinatioun mat bestëmmte Chemotherapien ze benotzen, well et deenen hir Wierkung reduzéiere géing. “Et muss een och oppassen, wa Kurkuma a Kombinatioun mat enger Hormontherapie géint Broschtkriibs benotzt gëtt”, réit d’Stëftung. Dat well d’Gewierz d’Empfindlechkeet an d’Effikassitéit vum Traitement verréngere kann.
Den Dr Bruno Raynard (Archiv), Chef vum Departement “Ernierung” beim Gustave Roussy Institut zu Villejuif bei Paräis, deen op Kriibsbehandlunge spezialiséiert ass, stellt fest, dass d’Quantitéit vu Curcumin, déi an de Kapselen enthal ass, “net deene vu komplementare Liewensmëttel, mee deene vu Medikamenter entsprécht”.
Den Ernierungsberoder gesäit an der Consultatioun “déi ganzen Zäit Patienten, déi dëst oder dat komplementaart Liewensmëttel teste wëllen, well si mengen, dass et hinnen hëllefe kann.” Dat Wichtegst, huet hien an engem Interview mat der AFP den 19. Oktober betount, “ass et, doriwwer ze schwätzen an zesummen ze kucken, wat interessant ass a wat net, an ze probéieren, e Konsens am Kader vum gesamte Projet ze fannen.”
Wat e potenziellen Effekt op Kriibs betrëfft, sou gëtt et bis elo keng Beweiser. “Bei Mais gëtt et positiv an aner negativ Etüden, a beim Mënsch sinn d’Resultater leider am Moment negativ”, seet hien.
Hie verweist och op Méiglechkeeten, fir d’Niewewierkunge vu Kriibstherapien ofzefiederen, besonnesch bei Radiodermitis, enger Entzündung vum Geweebe, déi no der Stralentherapie virun allem bei Broschtkriibs optrëtt: “Et huet een erwaart, dass Curcumin-Kapselen eng reell Verréngerung vun der Intensitéit an der domat verbonnener Péng bewierke géifen, awer dës Resultater sinn net erreecht ginn”, bedauert hien.
“Et ass net, well d’Resultater elo enttäuschend sinn, dass ee sech méiglecherweis net virstelle kann, dass et an Zukunft Curcumin-Traitementer wäert ginn. Et ass en interessante Wee, awer am Moment gëtt et näischt, wat versprécht, dass et e Wonnermëttel ass”, huet den Expert resuméiert. “Et heelt kee Kriibs.”
Keng europäesch Allegatioun, Etüde ginn nach net duer
D’Wierkunge vu Curcumin ginn och bei anere Krankheeten ënnersicht, awer och hei si se net genuch beluecht.
D’Fanny Huret vun der ANSES erënnert dorun, dass Curcumin an Europa keng zoulässeg Allegatioun (Archiv) huet. Eng Allegatioun “ass e Message, deen op bestëmmte Liewensmëttelverpackunge steet oder engem Produit bäigefüügt ass (Reklamm, Internetsite), an deem déi gesondheets- an/oder ernierungsphysiologesch Eegenschafte vu Liewensmëttel oder Liewensmëttelbestanddeeler ugi ginn”, entspriechend enger ganz strenger Reegelung.
“D’Niewewierkunge vu Curcumin op d’Gelenkfunktioun gi vun den europäeschen Autoritéiten ënnersicht (Archiv), fir eng méiglech Allegatioun ze kréien. Dat ass eng Allegatioun, déi bis elo nach net zougelooss gouf”, erënnert sech d’Spezialistin.
© AFP
D’Auswierkunge vu Curcumin op d’Reguléierung vum Bluttzocker bei Diabetiker ass och nach net erfuerscht. An dëser Analys vun enger Rei Etüden (Archiv) zu dësem Sujet kommen d’Fuerscher zur Konklusioun, dass Curcumin am Verglach zu Placebo zu enger signifikanter Senkung vum niichtere Bluttzocker bäidréit. Dëst sinn nach virleefeg Resultater, déi nach duerch weider Etüden ënnermauert musse ginn.
Op der medezinescher Informatiounssäit Medscape (Archiv) mengt den Dr Boris Hansel, Diabetolog an Ernierungswëssenschaftler, dass “et menger Meenung no eng gutt Noriicht ass, se a Form vu Gewierzer an den Alldag ze integréieren. Iwwregens ass et dacks hëllefräich, fir eppes Aneres wéi Salz oder Zocker ze reduzéieren”. Gläichzäiteg warnt hien awer viru komplementare Liewensmëttel: “Ech sinn net dofir. Et feelt un zouverlässege Referenzen, fir se de Patienten ouni Bedenken ze verschreiwen.”
Dat empfeelt och den Dr Raynard, dee seet, dass “de Pleséier, e schaarfe Plat ze iessen, Endorphiner fräisetzt an den Appetit ureegt.”
Dësen AFP-Artikel gouf vun RTL op Lëtzebuergesch iwwersat.
