En ale Video, deen haaptsächlech op WhatsApp a Südafrika am Ëmlaf ass, weist eng Opnam vun enger Wiederkaart, déi extreem kaalt Wieder am a ronderëm d’Land virausseet. Den Erzieler vum Video behaapt, dass d’Kaart “staarke Schnéifall” an den nächsten zéng Deeg weist, dee viraussiichtlech eng Partie Regioune vu Südafrika treffe géif. Dës Behaaptung ass awer ierféierend.
De Video iwwer 90 Sekonne weist blo, gréng a giel Wiedermodeller südlech vum afrikanesche Kontinent. Dee bloe weist kal Loftstréimungen.
Den Erzieler stellt sech selwer als “Juandre vum Onwieder-Alarm, Äre Wiederhooligan” vir a beschreift déi “grouss polar Loftstréimungen”, déi fir an zéng Deeg prognostizéiert ginn.
Hie füügt bäi, dass d’Südafrikaner a ville Géigende mat heftege Schnéifäll rechne kënnen, dorënner och Johannesburg.
© AFP
De Video war den 12. Abrëll 2023 och op TikTok opgedaucht, zesumme mat engem Text, deen dorop hindeit, dass de Schnéifall, dee virausgesot gëtt, wierklech geschéie wäert.
Op Facebook huet en Notzer d’oppe Grupp vum Onwieder- an Informatiounszenter vu Südafrika (SWAICSA) gefrot, ob dat “falsch oder al Noriichte” wären.
© AFP
Den Administrateur vun der Grupp huet dorop geäntwert (hei archivéiert) an huet de User op e Facebook-Bäitrag higewisen, deen hien 2022 gepost hätt, fir ze weisen, dass et net déi éischt Kéier ass, dass hien op Fakten zu dësem Video hiweise muss.
© AFP
“Wannechgelift beuecht, dass dëse Video vu mengem Brudder vun enger anerer Mamm, The Weather Hooligan, en ale Video ass. Dëse Video war net gefälscht, wéi e gedeelt gouf. Et gouf wierklech Schnéi a groussen Deeler vu Südafrika”, steet am Bäitrag.
Lokal Medien hunn dee selwechte Video am Abrëll 2022 analyséiert an dozou recherchéiert, nodeems de Video op en Neits seng Ronnen am Internet gedréint huet.
Wiederhooligan
D’Ekipp vum AFP-Faktencheck huet eng Stéchwierdersich no “Wiederhooligan Südafrika” (engl. “Weather Hooligan South Africa”) duerchgeféiert an en Artikel vum Juli 2022 fonnt, deen den Erzieler vum Video als Juandre Vorster virgestallt huet, e südafrikanesche Wiederenthusiast, dee Komedien a seng Viraussoen abezitt.
© AFP
De Vorster huet den 10. Abrëll 2023 e Video verëffentlecht, an deem hie geckst, dass de Video mat der Schnéiprevisioun him Dausende vu Joren nohänke wäert.
“Ech wollt Iech just wësse loossen, dass et al Noriichte sinn, well et wäert déi nächst 10.000 Joer am Wanter esou lafen, fir de Rescht vu mengem Liewen”, sot de Vorster. “En ass al, kommt driwwer ewech, läscht et a lieft weider.”
De südafrikanesche Wiederdéngscht huet den ale Video an engem Statement vum 11. Abrëll 2023 och ernimmt.
“An den nächsten zéng Deeg ass kee Schnéifall an deene Regioune virausgesot, déi an dësem Video ernimmt ginn”, heescht et an der Erklärung, wou och drastoung, dass e bësse Reen an eng Kalfront erwaart ginn.
Dësen AFP-Artikel gouf vun RTL op Lëtzebuergesch iwwersat.
